Hokkeı: Elordadaǵy halyqaralyq týrnırde Reseı Belarýsti jeńdi
NUR-SULTAN. QazAqparat - Búgin elordada shaıbaly hokkeıden Qazaqstan Hockey Open-2021 týrnıriniń ekinshi oıyn kúni ótti. Bul joly Reseı jáne Belarýs quramalary kezdesti, dep habarlaıdy QazAqparat tilshisi.
Alǵashqy kezeńde reseılik hokkeıshiler sátti oıyn kórsetti. Olardyń qatarynan Ilıa Morozov 5-mınýtta, Alekseı Toropchenko 12-mınýtta mergendigimen kózge tústi.
Oǵan ekinshi kezeńde Belarýs quramasy sapynan Ivan Drozdov 27, Igor Martynov 30-mınýtta eki golmen jaýap qaıyryp, tarazy basy teńesti. Al 33-mınýtta Marat Haırýllın Reseıdi qaıtadan alǵa shyǵardy. Oıynnyń 43-mınýtynda reseılik Rafael Bıkmýllın qorytyndy esepti belgiledi. Kezdesýde Reseı quramasy 4:2 esebimen basym tústi.
Esterińizge sala ketelik, 10 aqpanda atalǵan týrnırde Qazaqstan Belarýsti 5:2 esebimen tize búktirdi.
Endi 12 aqpanda Qazaqstan men Reseı quramalary sheberlik baıqasady. Jeńgeni týrnırdiń jeńimpazy atanady.
Bıyl alǵash ret uıymdastyrylǵan týrnır bıylǵy álem chempıonatyna daıyndyq esebinde júrgiziledi. Ol 2021 jyldyń 21 mamyry men 6 maýsymy aralyǵynda Latvııada bolady.
