Hokkeı: Darren Dıts «Barystan» TsSKA komandasyna aýysty
NUR-SULTAN. QazAqparat – Qazaqstan ulttyq quramasynyń qorǵaýshysy Darren Dıts «Barystan» Máskeýdiń TsSKA klýbyna aýysty, dep habarlaıdy QazAqparat tilshisi.
«Barys» hokkeı klýbynyń baspasóz qyzmeti málim etkenindeı, qos komanda D.Dıtstiń TsSKA-ǵa aýysýy jóninde kelisken.
Kelisim aıasynda qazaqstandyq klýb qarjylaı ótemaqy alady.
Darren Dıts «Barys» quramynda bes maýsym boıy oınady. Qurlyq hokkeı lıgasynda osy kezeńde ol 269 match ótkizip, 67 gol soǵyp, 107 nátıjeli pas berdi. Sóıtip 174 balǵa qol jetkizdi.
«Barys» hokkeı klýby burynǵy kapıtanǵa aldaǵy sporttyq jolynda tabysqa jetýine tilektestigin bildirdi.
Eske sala keteıik, budan buryn «Barystyń» elordada «Neftehımıkke» ese jibergenin jazǵan bolatynbyz.
