Hokkeı: TsSKA-«Barys» matchyn qaıdan kórýge bolady
NUR-SULTAN. QazAqparat - Búgin elordalyq «Barys» qurlyqtyq hokkeı lıgasynda Reseıdiń TsSKA komandasymen kezdesedi, dep habarlaıdy QazAqparat tilshisi.
Máskeý qalasynda ótetin oıyn eki komanda arasyndaǵy 23-i kezdesý bolmaq. Buǵan deıin reseılik armııashylar 12 márte jeńiske jetse, 6-aýy elordalyq klýbtyń basymdyǵymen aıaqtaldy.
Týrnır kestesinde TsSKA 56 oıynnan keıin 86 upaı jınap, birinshi orynda tur. Al jetinshi orynǵa jaıǵasqan «Barystyń» enshisinde 75 upaı bar. Eki komanda da pleı-off kezeńine joldamany erterek qaltaǵa basyp úlgerdi.
Aıta keterligi, armııashylar sońǵy toǵyz kezdesýdiń nebári bireýinde ǵana qarsylasyna ese jiberdi. «Barys» komandasy da qarqyndy oıyn kórsetip keledi. Olar sońǵy on oıynnyń nebári ekeýinde jeńildi. Eki komanda bıyl bir márte kezdesip úlgerdi. Nur-Sultan qalasynda ótken oıynda TsSKA 0:3 esebimen jeńiske jetken edi.
TsSKA men «Barys» arasyndaǵy kezdesý elorda ýaqytymen 22.30-da bastalady. Oıyn «Qazsport» telearnasynan tikeleı efırde kórsetiledi.
Budan buryn «Barys» Ekaterınbýrgte jergilikti «Avtomobılıst» komandasyn 4:2 esebimen jeńgen bolatyn.
