Hokkeı: Bıylǵy álem chempıonaty tolyǵymen Latvııada ótedi
NUR-SULTAN. QazAqparat - Shaıbaly hokkeıden 2021 jylǵy álem chempıonaty tolyǵymen Latvııada ótetin boldy. Halyqaralyq hokkeı federatsııasy osyndaı sheshim qabyldady, dep habarlaıdy QazAqparat tilshisi.
Aıta keteıik, dúbirli doda bıyl Belarýs astanasy - Mınsk, Latvııa astanasy - Rıga qalalarynda 21 mamyr jáne 6 maýsym aralyǵynda ótkizilýi tıis bolatyn.
Álemniń kóptegen memleketteri men demeýshiler Belarýstegi saıası jaǵdaıdyń turaqsyz bolýyna baılanysty ony tizimnen alyp tastaý jóninde usynys bildirgen.
Osyndaı usynystardy eskere kele Halyqaralyq shaıbaly hokkeı federatsııasy álem chempıonatynyń fınaldyq kezeńi Belarýste ótpeıtinin málimdedi.
Latvııa jerindegi dúbirli dodada «Rıga Arena» negizgi sport kesheni sanalady.
Onda aldymen V tobyndaǵy quramalar sheberlik baıqasady.
Odan keıin eki shırek fınal bolsa, quramalar kelesi kezekte jartylaı fınal oıyndaryn ótkizedi.
Fınal men úshinshi oryn úshin saıys ta atalǵan arenada bolady.
Olımpıadalyq sport ortalyǵy álem chempıonatynda ekinshi arena retinde engizilgen. Oǵan 6 myńnan astam adam sııady.
Munda A tobyndaǵy jáne eki shırek fınal oıyndar ótkiziledi.
Esterińizge sala ketelik, top-dıvızıonda bıyl Qazaqstan quramasy da baq synaıdy.
Qazaqstandyq hokkeıshiler V tobynda Kanada, Fınlıandııa, AQSh, Germanııa, Norvegııa, Italııa jáne Latvııa quramalarymen sheberlik baıqasady.
Al A tobynda Shvetsııa, Chehııa, Shveıtsarııa, Slovakııa, Danııa, Belarýs, Ulybrıtanııa jáne Reseı bar.
