Hokkeı: Bir mınýtta qaqpasyna úsh gol ótkizip alǵan «Barys» býllıtte jeńiske jetti (FOTO)
ASTANA. QazAqparat - Qurlyqtyq hokkeı lıgasy turaqty chempıonatynyń óz aıdynyndaǵy sońǵy kezdesýinde Astananyń «Barysy» Chelıabiniń «Traktoryn» qabyldap, býllıt serııasynda jeńiske jetip, mańyzdy eki upaıdy enshiledi.
Matchty qarqyndy bastaǵan astanalyqtar 3-shi mınýtta-aq san basymdylyǵyn paıdalanyp, komanda kapıtany Brendon Bochenskıdiń pasynan keıin Naıdjel Doýs esep ashty. 12-mınýtta «Traktordyń» qaqpasyna býllıt belgilenip, ony Roman Starchenko dál oryndap, esepti 2:0-ge jetkizdi. 16-mınýtta qonaqtardan Andreı Popov mergendigimen kózge túskenimen, eki mınýttan keıin «Barystyń» qorǵaýshysy Roman Savchenko esepti qaıtadan ulǵaıtty.
Oıynnyń ekinshi kezeńi «Barys» úshin asa sátsiz bastalǵany sondaı, 22-shi mınýtta aıdyn ıeleriniń qaqpasyna birden úsh gol soǵyldy. Áýeli slovakııalyq legıoner ıAn Latso qorǵaǵan qaqpaǵa Anton Glınkın, sodan keıin Martın Rýjıchka qatarynan eki shaıba engizdi. Budan keıin astanalyqtardyń bas bapkeri Andreı Nazarovtyń sheshimimen qaqpany qorǵaýǵa shyqqan Pavel Polýektov oıynǵa kirispeı jatyp, Maksım ıAkýtsenıadan taǵy bir goldy ótkizip aldy. Sóıtip bir mınýtta úsh gol soqqan «Traktor» 4:3 esebimen alǵa shyqty.
Úshinshi kezeńde ǵana «Barys» áýpirimdep 50-mınýtta Dastın Boıdtyń arqasynda tarazy basyn teńestire aldy. Match 4:4 bolyp aıaqtalǵannan keıin belgilengen overtaım eshqandaı nátıje bermedi. Al býllıt serııasynda Pavel Polýektov «Traktor» úmit artqan úsh oıynshynyń da soqqysyn qaıtaryp, erlik jasady. Al «Barys» sapynan Maık Landın mergendik tanytyp, sheshýshi goldy saldy.
Sonymen, «Barys» býllıt serııasynda 5:4 esebimen utyp, osy maýsymdaǵy 27-inshi jeńisine qol jetkizdi. Andreı Nazarovtyń shákirtteri 55 oıynnan keıin 80 upaı jınap, Shyǵys konferentsııasynda burynǵysha pleı-off básekelerine shyǵýǵa múmkindik beretin jetinshi orynda keledi. Áıtse de osy týrda Ekaterınbýrgtegi óz aıdynynda Ýfanyń «Salavat ıÝlaev» komandasyn overtaımda 3:2 esebimen utqan «Avtomobılıst» 54 kezdesýden soń 79 upaımen «Barysty» ókshelep tur ári onyń bir oıyny kem, ıaǵnı múmkindigi joǵary. Onyń ústine toǵyzynshy satydaǵy «Neftehımık» (Nıjnekamsk) komandasynyń 54 oıynnan 78 upaıy bar. Demek, ol da «Barysty» qýyp jete alady. Sońǵy kezde qarqyndy oınap júrgen «Neftehımık» Ombyda kósh basyndaǵy «Avangardty» 4:1 esebimen tize búktirip, kezekti úsh upaıyna ıe boldy.
Astanalyqtar 1 aqpan kúni Ýfada Shyǵys konferentsııasynda 88 upaımen tórtinshi orynda turǵan «Salavat ıÝlaevpen» «Ýfa-Arena» aıdynyna shyǵady. Osyǵan deıin qatarynan tórt márte utylǵan ýfalyq klýbtyń da sheginer jeri joq. Onyń aldynda, 29 qańtar kúni ýfalyqtar sol aıdynda «Neftehımıktiń» shamasyn baıqap kóredi. Sodan keıin «Barys» taǵy tórt oıynyn syrt aıdynda ótkizedi, ıaǵnı endi upaı jınaý úlken kúshke túspek. Turaqty chempıonat 18 aqpan kúni márege jetip, pleı-off básekesine joldama alǵan komandalar tolyqtaı belgili bolady.
