Hokkeı: «Barystyń» pleı-off satysyndaǵy qarsylasy anyqtaldy
NUR-SULTAN. QazAqparat - Qazaqstandyq «Barys» qurlyqtyq hokkeı lıgasy pleı-off satysynda Reseıdiń «Metallýrg» (Magnıtogorsk) komandasymen sheberlik baıqasady, dep habarlaıdy QazAqparat tilshisi.
Jarys talaby boıynsha jarystyń atalmysh satysynda komandanyń bireýi tórt jeńiske jetkenge deıin sozylady. Alǵashqy kezdesý 1 naýryzda bastalady. Sol kúni elordada eki komanda kezdesse, 3 naýryzda elordada taǵy bir oıyn ótedi. Al 5 jáne 7 naýryz kúnderi oıyndar Magnıtogorsk qalasynda bolady. Qajet bolǵan jaǵdaıda qosymsha oıyndar 9, 11, 13 naýryz kúnderi oınalady.
Aıta keterligi, «Barys» qurlyqtyq hokkeı lıgasyna bıyl 12 márte qatysty. Sonyń 10-da pleı-off satysynyń baq synady. 2014, 2017, 2019 jyldarda jarystyń ekinshi kezeńine shyqty.
Eki komanda buǵan deıin pleı-off satysynda eki márt jolyqty. 2011/2012 jylǵy kezeńde shyǵys konferentsııasynda 1/4 fınalda reseılik klýb oıyndar serııasynda 4:3 esebimen jeńiske jetip, jarysty jalǵastyrýǵa múmkindik aldy. Al 2016/2017 jylǵy kezeńde eki komanda shyǵys konferentsııasynda jartylaı fınalda jolyǵyp, oıyndar serııasynda elordalyq komanda qarsylasyna 0:4 esebimen ese jiberdi.
«Barys» pen «Metallýrg» búgingi kúnge deıin barlyǵy 37 kezdesý ótkizdi. Onyń 11-i elordalyq klýbtyń basymdyǵymen aıaqtalsa, qalǵanynda qarsylasyna ese jiberdi. Aıta keterligi, qurlyqtyq hokkeı lıgasynyń 2019/2020 jylǵy dodasynyń turaqty kezeńinde eki komanda 4 oıyn ótkizdi. Qýanarlyǵy, onyń úsheýinde «Barys» jeńiske jetti.
Elordalyq klýb búgin, 26 aqpanda turaqty kezeńdegi sońǵy oıyndy ótkizedi. Bul joly syrt aıdynda Habarovskiniń «Amýr» komandasymen kezdesedi. Al 24 aqpanda «Barys» Vladıvostokta jergilikti «Admıraldy» 3:1 esebimen jeńip ketti.