Hokkeı: «Barystyń» erteńgi qarsylasy - máskeýlik «Dınamo»
ASTANA. 12 aqpan. QazAqparat - Erteń, astanalyq «Barys» hokkeı klýby óz alańynda «Dınamo» (Máskeý) komandasyn qabyldaıdy.
Buǵan deıin osy eki komanda 11 ret kezdesken edi. Onyń basym bóliginde «Dınamo» komandasy jeńiske jetti. «Barystyń» jigitteri bolsa, tek 2 oıynda ǵana óz qarsylasyn utty. Al Qurlyqtyq hokkeı lıgasynyń búgingi týrnırlik kestesinde máskeýlik «Dınamo» 98 upaımen 3-shi orynǵa ornalasyp aldy. Al «Barystyń» enshisinde 79 upaı bar.
Degenmen, «Barystyń» lıga aıasyndaǵy sońǵy oıyndary jaman emes. Buǵan deıin ol «Salavat ıÝlaev» (Bashqortostan), «Aq Bars» (Tatarstan) jáne «Avangard» (Reseı) komandalaryn tize búktirgen bolatyn. Alaıda Sochı Olımpıadasyna irikteý týrnıri kezinde Qazaqstannyń negizgi quramasyna engen «Barys» hokkeıshileri Latvııaǵa utylyp, bir upaıdyń kesirinen joldamadan aıyrylyp qalǵan. Sonyń bári «Barysqa» keri áserin tıgizbese, «Dınamomen» ótetin erteńgi oıyn da qyzyqty ári tartysty ótýi tıis.
