Hokkeı: «Barystyń» búgingi qarsylasy - «Severstal»
ASTANA. 8 qyrkúıek. QazAqparat - Búgin Astanadaǵy «Qazaqstan» sport kesheninde Qurlyqtyq hokkeı lıgasynyń kezekti altynshy chempıonaty aıasynda «Barys» hokkeı klýby «Severstal» komandasymen kezdesedi.
Búgingi oıynda «Barys» ádettegi quramda óner kórsetetin bolady. Alaıda keıbir turmystyq jaǵdaılarǵa baılanysty bul joly shabýylshy Nıkolaı Antropov muz aıdynyna shyǵa almaıdy. Sebebi onyń birqatar qujattaryn rásimdeý kerek, Oǵan qosa, taıaýda N.Antropovtyń úshinshi balasy dúnıege keldi. Bul qýanyshty jaǵdaı da onyń Qazaqstanǵa kelý ýaqytyn shegertti. Jalpy, «Barys» komandasy úshin bul - alǵashqy oıyn. Al «Severstal» buǵan deıin bir match ótkizip, «Avtomobılıstten» 2:1 (býllıt) esebimen basym túsken bolatyn. Aıta ketken jón, «Barystyń» búgingi oıyny keshki saǵat 17:00-de bastalady. Ony «Qazsport» arnasynan tikeleı efır arqyly kórýge bolady.
