Hokkeı: «Barystyń» búgingi qarsylasy - «Donbass»
ASTANA. 17 qazan. QazAqparat - Búgin «Barys» hokkeı klýby óz aıdynynda Ýkraınanyń «Donbass» (Donetsk qalasy) quramasyn qabyldaıdy.
Aıta ketken jón, bıyl Qurlyqtyq hokkeı lıgasyna alǵash ret qosylǵan «Donbass» komandasy osy ýaqytqa deıin 16 oıyn ótkizip, 6 kezdesýdi jeńispen aıaqtady. Onyń enshisinde 16 upaı bar. Bobrov dıvızıonynda ol 6-shy orynda keledi.
«Barys» bolsa, sońǵy eki oıynda óz qarsylastaryn oısyrata utyp, 26 upaımen Chernyshev dıvızıonynda 2-shi orynǵa kóterildi. Bizdiń hokkeıshiler 17 oıynnyń 8-inde jeńis tuǵyrynan kórine bildi.
Esterińizge sala keteıik, «Barys» - «Donbass» kezdesýi Astana ýaqyty boıynsha saǵat 19:00-de bastalady. Ony «Astana» telearnasynan tikeleı efır arqyly kórýge bolady.
