Hokkeı: «Barystyń» bas bapkeri otstavkaǵa jiberildi
ASTANA. QazAqparat - Astanalyq «Barys» hokkeı klýbynyń bas bapkeri Evgenıı Koreshkov otstavkaǵa jiberildi, dep habarlaıdy QazAqparat hokkeı klýbynyń resmı saıtyna silteme jasap.
«Barys» hokkeı klýbynyń 2017-2018 maýsymnyń Qurlyqtyq hokkeı lıgasyndaǵy tómen sporttyq kórsetkishterin eskere otyryp, Qamqorshylyq keńes mynadaı sheshim qabyldady. 1. «Barys» HK bas bapkeri E.G. Koreshkov laýazymynan bosatylsyn. 2. «Barys» HK bas bapkeri mindetin atqarýshy qyzmetine aǵa bapker Mámbetálıev G.B. taǵaıyndalsyn», - dep habarlandy hokkeı klýbynyń resmı saıtynda.
Eske sala ketsek, 29 jeltoqsan kúni Qurlyqtyq hokkeı lıgasynyń (QHL) kezekti oıynynda Astananyń «Barysy» óz aıdynynda «Sochı» komandasyn qabyldap, 2:3 esebimen utylyp qalǵan edi. 6 qazan kúni Sochıde ótken oıynda da «Barys» 1:3 esebimen súringen bolatyn. 63 upaıy bar astanalyqtar Shyǵys konferentsııasynda onynshy orynda keledi. Al pleı-off básekesine joldama alý úshin keminde segizinshi satyǵa kóterilý kerek. Bul mindetti oryndaý kúnnen-kúnge qıyndap bara jatyr.
Aıta keteıik, elordalyqtar 3 qańtar kúni óz aıdynynda Shyǵys konferentsııasynda kósh sońynda kele jatqan «ıÝgra» (Hanty-Mansıısk) komandasyn qabyldaıdy. Sodan keıin Habarovskige sapar shegip, 9 qańtarda pleı-ofqa shyǵý jolyndaǵy negizgi qarsylastarynyń biri «Amýrmen» aıqasady.
