Hokkeı: «Barystyń» aldaǵy maýsymǵa daıyndyq jospary belgili boldy
ASTANA. QazAqparat - Shaıbaly hokkeıden elordalyq «Barys» komandasynyń aldaǵy maýsymǵa daıyndyq jospary belgili boldy, dep habarlaıdy QazAqparat tilshisi.
Elordalyq klýb demalystan 16 shildede shyǵady.
Eki kún boıy oıynshylar medıtsınalyq tekseristen ótedi. Al 19 shilde kúni test tapsyrý josparlanǵan. Odan keıin 20 shilde - 8 tamyz aralyǵynda Astanada oqý-jattyǵý jıyndarynyń birinshi kezeńi bastalady.
Komanda 10-14 tamyz aralyǵynda Reseıdiń Qazan qalasynda ótetin «TANECO Kýbogyna» qatyssa, 20-25 tamyz kúnderi Ombydaǵy týrnırde baq synaıdy.
Bıyl elordada Qazaqstan Respýblıkasy Prezıdentiniń Kýbogy týrnıri ótpeıdi. Oǵan basty sebep retinde qatysýshylar sany az ekeni aıtylyp otyr.
Sondaı-aq, 28-31 tamyz aralyǵynda elordada oqý-jattyǵý jıyndarynyń sońǵy kezeńi bolady.
Qurlyqtyq hokkeı lıgasynyń jańa maýsymy 1 qyrkúıekte bastalady dep josparlanyp otyr.
Eske salsaq, budan buryn Qazaqstan quramasy parahokkeıden qurlyqtyq kýboktyń «qolasyn» jeńip aldy.
