Hokkeı: «Barysqa» «Sochımen» oıynda da sáttilik jetispedi
ASTANA. QazAqparat - Qurlyqtyq hokkeı lıgasynyń (QHL) kezekti oıynynda Astananyń «Barysy» óz aıdynynda «Sochı» komandasyn qabyldap, 2:3 esebimen utylyp qaldy, dep habarlaıdy «QazAqparat» tilshisi.
Osynyń aldyndaǵy 15 kezdesýdiń 13-inde jeńilip, pleı-off aýylynan alystap ketken astanalyqtarǵa sheginer jol joq edi. Onyń ústine «Aq Baryspen» ótken matchta shvetsııalyq qaqpashy Henrık Karlsson tóreshilerge shabýyl jasap, aıypqa iligip, qatarynan úsh oıynǵa aıdynnan alastatyldy. Sondyqtan qaqpa 22 jasar qazaqstandyq Sergeı Kýdrıavtsevke senip tapsyryldy. Buryn «Barys» qaqpasyn qorǵap kórgen 30 jasar Dmıtrıı Malgın kómekke shaqyryldy. Oǵan qosa komanda kapıtany Naıdjel Doýstyń jaraqattan keıin orala almaýy da ońaı tıip otyrǵan joq. Degenmen bul joly QHL keshirim bergennen keıin «Barysqa» qaıta kelgen, eshkimge esesin jibermeıtin, kerek kezinde tóbelesten de qashpaıtyn atyshýly qorǵaýshy Damır Ryspaev boı kórsetip, tipti qarsylastarynyń birine «múıiz shaıqap» úlgerdi.
«Barys» kezdesýdi birden shabýylmen bastady. Kóp uzamaı sochılikter de azýynyń bar ekendigin kórsetti. Birinshi kezeńde qos komanda biraz múmkindikteri bolǵanymen, gol soǵatyn sátterdi paıdalana almady.
Ekinshi kezeńde aıdyn ıeleri taǵy bir márte san basymdylyǵyna ıe bolǵanymen, qonaqtar sátti qorǵana bildi. Degenmen 32-mınýtta Ivan Kýchın men Vladımır Markelovtyń pasynan keıin 18 jasar qazaqstandyq qorǵaýshy Valerıı Orehov mergendik tanytyp, QHL-daǵy alǵashqy golyn soqty. Bul «Barys» sapyndaǵy jas oıynshylardyń sheberligi ósip kele jatqandyǵyn bildirgendeı edi. Áıtse de ekinshi kezeń sońyna taman I.Kýchın joq jerden tártip buzyp, aıdynnan qýylǵannan keıin sochılikter (Erık O'Dell) tarazy basyn teńestirip ketti. Budan soń sochılik Pavel Padakın qysyltaıań sátte qaqpany ıterip jiberip, aman alyp qaldy. Biraq eki mınýtqa aıdynnan qýyldy.
Kezdesýdiń úshinshi, sheshýshi bóligin san basymdylyǵymen bastaǵan elordalyqtar muny paıdalana almady. Kerisinshe 44-mınýtta «Barystyń» qorǵanys shebi syr berip, qaqpa aldynda jalǵyz qalǵan dál sol P.Padakın «Sochıdi» alǵa shyǵardy. Aıdyn ıelerine amalsyz qarqyndy údete túsýlerine týra keldi. Áıteýir 51-mınýtta birinshi bestik te bar ekendigin kórsetip, Kevın Dallman men Djeıms Raıttyń kómegimen Lınden Veı esepti teńestirdi. Match bitýge eki mınýttaı ýaqyt qalǵanda, shabýyl kezinde Mettıý Frettın tártip buzyp, komandasyn qıyn jaǵdaıda qaldyrdy. Osyny múlt jibermegen Keısı Ýellman esepti 3:2-ge jetkizdi. Evgenıı Koreshkov beıneqaıtalaýǵa júgingenmen, odan eshteńe shyqpady. Budan keıin nebári otyz sekýndtaı ýaqyt qalǵan edi. «Barys» qaqpashysyn aýystyryp, aıdynǵa altynshy oıynshysyn shyǵardy. Onyń ústine «Sochıden» bir hokkeıshi aıdynnan qýyldy. Biraq ýaqyt jetpedi.
Osylaısha, Evgenıı Koreshkovtyń shákirtteri óz aıdynyndaǵy sońǵy tórt oıynnyń bárinde de jeńilis tapty. 6 qazan kúni Sochıde ótken oıynda da «Barys» 1:3 esebimen utylyp qalǵan bolatyn. 63 upaıy bar astanalyqtar Shyǵys konferentsııasynda onynshy orynda keledi. Al pleı-off básekesine joldama alý úshin keminde segizinshi satyǵa kóterilý kerek. Bul mindetti oryndaý kúnnen-kúnge qıyndap bara jatyr.
Aıta keteıik, elordalyqtar 3 qańtar kúni óz aıdynynda Shyǵys konferentsııasynda kósh sońynda kele jatqan «ıÝgra» (Hanty-Mansıısk) komandasyn qabyldaıdy. Sodan keıin Habarovskige sapar shegip, 9 qańtarda pleı-ofqa shyǵý jolyndaǵy negizgi qarsylastarynyń biri «Amýrmen» aıqasady.
