Hokkeı: «Barys» joldastyq kezdesýde «Saryarqany» oısyrata jeńdi
NUR-SULTAN. QazAqparat - Elordalyq «Barys» búgin Qaraǵandynyń «Saryarqa» komandasymen joldastyq kezdesý ótkizdi, dep habarlaıdy QazAqparat tilshisi. Atalǵan oıynda elordalyq klýb qarsylasynan 8:2 esebimen basym tústi.
Birinshi kezeńde esepti alǵash bolyp «Saryarqa» hokkeıshisi Vladıslav Kýlıev ashty. Odan keıin «Barys» qatarynan segiz shaıba soqty. Birinshi kezeńde Anton Sagadeev 8, Álıhan Ásetov 17-mınýtta qaraǵandylyq komanda qaqpasynan sańylaý tapty.
Ekinshi kezeńde elordalyq klýb sapynan Lınýs Vıdel 24, Egor Petýhov 33-mınýttarda mergendik tanytty.
Al úshinshi kezeńde «Barys» qatarynan Dmıtrıı Gýrkov 51, Nıkıta Mıhaılıs 53, Darren Dıts 56, Dmıtrıı Shevchenko 58-mınýttarda qarsylas klýbty qapy qaldyrdy. Qorytyndy esepti 60-mınýtta «Saryarqa» sapynan Aleksandr Borısevıch belgiledi.
Esterińizge sala ketelik, «Barys» budan buryn Óskemenniń «Torpedo» klýbymen eki márte joldastyq kezdesý ótkizdi. Alǵashqysynda 1:2 esebimen jeńilip, ekinshi oıynda 6:4 esebimen basym tústi. Al 31 tamyzǵa josparlanǵan Reseıdiń «Avtomobılıst» (Ekaterınbýrg) komandasymen joldastyq kezdesý ótkizilmeıtin boldy.
Qurlyqtyq hokkeı lıgasyndaǵy alǵashqy oıynyn «Barys» 3 qyrkúıekte Latvııada «Dınamo» (Rıga) komandasyna qarsy ótkizedi.
