Hokkeı: «Barys» jeńilisten kóz ashpaı keledi
ASTANA. QazAqparat - Qurlyqtyq hokkeı lıgasynda (QHL) óner kórsetetin Astananyń «Barysy» jeńilisten kóz asha alar emes, dep habarlaıdy «QazAqparat» tilshisi.
Bul jolǵy kezdesýin Ǵalym Mámbetálıev ýaqytsha jattyqtyryp júrgen astanalyqtar Vladıvostokta ótkizdi. Olar Shyǵys konferentsııasynda 12-orynda kele jatqan «Admıral» komandasymen kezdesip, 1:3 esebimen ese jiberdi. «Admıraldan» Artem Zemchenok, Maksım Kazakov, Andreı Alekseev kózge tússe, oǵan «Barystan» Anton Sagadeev bir ǵana golmen jaýap qaıyrdy.
Osylaısha, elordalyqtar sońǵy 19 oıynnyń 17-sinde jeńilis tapty. Segiz match qatarynan utylyp otyrǵan «Barys» pleı-off básekesinen birjola úmitin úzdi dep aıtýǵa bolady. Qalǵan alty oıynda astanalyqtar mundaı «qarqynymen» upaı alady dep aıtý qıyn.
Aıta keteıik, Shyǵys konferentsııasynda burynǵysha 63 upaımen onynshy orynda kele jatqan «Barys» kelesi básekesin 16 qańtar kúni Tolıattıde kósh sońyndaǵy «Lada» komandasymen ótkizedi.
