Hokkeı: «Barys» «Iokerıt» komandasyn 4:0 esebimen utty
ASTANA. QazAqparat - Qurlyqtyq hokkeı lıgasynyń (QHL) kezekti oıynyn Astananyń «Barysy» óz aıdynynda Helsınkıdiń «Iokerıt» komandasymen ótkizip, 4:0 esebimen tize búktirdi, dep habarlaıdy «QazAqparat» tilshisi.
«Qazsport» telearnasynan tikeleı efırde kórsetkenindeı, QHL-dyń jalpy kestesi men Batys konferentsııasynda 55 upaımen úshinshi orynda kele jatqan asa myqty komandamen kezdesýge tastúıin daıyndyqpen shyqqan astanalyqtar jınaqy da sátti oınaı bildi. Sonyń dálelindeı 10-mınýtta Anton Sagadeevtiń pasyn paıdalanǵan qorǵaýshy Roman Savchenko esep ashty.
Ekinshi kezeńde komanda kapıtany Naıdjel Doýsqa kezek keldi. 24-mınýtta R.Savchenko men Konstantın Pýshkarevtiń kómegimen san basymdylyǵyn paıdalanǵan N.Doýs bıylǵy chempıonattaǵy óziniń 25-inshi golyn soǵyp, esepti 2:0-ge jetkizdi. Budan keıin Lınden Veı aıdynnan qýylyp, «Iokerıt» birneshe mınýt boıy úzdiksiz shabýyldap, «Barysqa» qorǵanýdan basqa amal qaldyrmady. Osyndaı qaýipti tusta qaqpashy, shvetsııalyq legıoner Henrık Karlsson bastaǵan aıdyn ıeleri qonaqtarǵa toıtarys bere aldy. 31-mınýtta «Iokerıttiń» shabýylshysy Petterı Vırtanen dóreki oınap, aıdynnan qýylǵan sátte mundaı múmkindikti elordalyqtar da paıdalana almady.
Úshinshi, sheshýshi kezeńde «Barys» komandasy oıynshylar almasý sátinde qatelik jiberip, Pavel Akolzın 2 mınýt aıyp ýaqytyn ótedi. Іle-shala Artem Lıhotnıkovty fın qorǵaýshysy Samı Lepıste shalyp jyǵyp, aıdyndaǵy oıynshylar sany teńesti. Mine, osy sátte qaqpaǵa jekedara shyqqan Talǵat Jaılaýov mergendik tanytyp, esepti 3:0-ge jetkizdi. 47-mınýtta Kırıll Polohov aıdynnan qýylǵan kezde de astanalyqtar óz qaqpasyn aman alyp qaldy. Sodan keıin Dmıtrıı Gýrkov tártip buzǵan kezde «Iokerıttiń» bas bapkeri ıÝkka ıAlonen qaqpashy Raıan Zapolskıdiń ornyna altynshy oıynshysyn shyǵardy. Jattyqtyrýshynyń bul tásili de óz jemisin bergen joq. Sosyn oıynshylar almasý sátinde «Barys» taǵy qatelik jiberip, «Iokerıt» qaqpashynyń ornyna altynshy oıynshysyn shyǵardy. Degenmen bul joly da elordalyqtar óz qaqpasyn aman saqtady. Ásirese, H.Larssonǵa rahmet aıtý kerek. Match aıaqtalýǵa bir mınýttaı ýaqyt qalǵanda, Darren Dıts bos qalǵan qaqpany dál kózdep, oıyn núktesin qoıdy.
Osylaısha, upaı sanyn 49-ǵa jetkizgen astanalyqtar QHL-dyń Shyǵys konferentsııasynda «Avangard» (Omby), «Neftehımık» (Nıjnekamsk) komandalarymen 2-4-inshi oryndy bólisýde.
Aıta keteıik, budan bes kún buryn «Barys» Helsınkıde dál osy «Iokerıtti» overtaımda 3:2 esebimen jeńip ketken bolatyn.
Astanalyqtar kelesi matchyn 1 qarasha kúni «Barys-Arenada» Bratıslavanyń «Slovan» komandasymen ótkizedi. «Slovan» 25 upaımen QHL-dyń jalpy kestesinde 24-inshi, Batys konferentsııasynda 12-inshi orynda keledi. Biraq QHL-da óner kórsetetin qaı klýbtyń da ońaı shaǵylatyn jańǵaq emestigin eskerý qajet-aq. Óıtkeni «Barystyń» azýly komandalarmen sátti oınap, álsiz sanalatyn klýbtardan kútpegen jerden jeńilip qalatyny bar.
