Hokkeı: «Barys» Ýfada aıdyn ıelerine ese jiberdi
ASTANA. QazAqparat - Qurlyqtyq hokkeı lıgasynyń turaqty chempıonatynda Astananyń «Barysy» «Ýfa-Arenada» «Salavat ıÝlaev» komandasymen oınap, tartysty kezdesýde 4:5 esebimen jeńilip qaldy.
Oıyndy aıdyn ıeleri qarqyndy bastap, Enver Lısın esep ashsa, kóp uzamaı Lınýs Ýmark 2:0-ge jetkizdi. Bir mınýttan keıin astanalyqtardan Dastın Boıd bir gol soqqanymen, otyz sekýndtaı ýaqyt ótpeı jatyp, «Salavat ıÝlaevtan» Teemý Hartıkaınen esepti qaıta ulǵaıtty.
Oıynnyń ekinshi kezeńinde Maık Landın men Konstantın Pýshkarev tarazy basyn teńestirgenimen, ýfalyqtar (Stepan Krıkýnov) qaıtadan alǵa shyqty. Úshinshi kezeńde Naıdjel Doýs san basymdylyǵyn paıdalanyp, esepti teńestire aldy. Alaıda aıdyn ıeleri (Oleg Saprykın) oıyn bitýge mınýt jarym ýaqyt qalǵanda jeńis golyn soǵyp ketti. Sóıtip osyǵan deıin bes ret qatarynan utylǵan «Salavat ıÝlaev» bórkin aspanǵa atsa, «Barys» mańyzdy úsh upaıyn joǵaltty.
Qazirgi kezde Andreı Nazarovtyń shákirtteri 56 oıynnan keıin 80 upaımen Shyǵys konferentsııasynda segizinshi orynda turǵanymen, ony saqtap qalý qıynǵa túsedi. Óıtkeni «Avtomobılıst» (Ekaterınbýrg) komandasy 81 upaımen qazirdiń ózinde jetinshi orynda tursa, ázirge toǵyzynshy oryndaǵy «Neftehımıktiń» «Baryspen» upaıy teń. Osy týrda Nıjnekamskide «Neftehımık» «Avtomobılısti» qabyldaýda, demek, olardyń upaı qoryn tolyqtyrýǵa múmkindikteri bar.
Astanalyqtar 3 aqpan kúni Sochıde birinshiliktiń azýly komandalarynyń biri «Sochı» hokkeı klýbymen aıdynǵa shyǵady.
Eske sala keteıik, 18 aqpan kúni márege jetetin turaqty chempıonatta «Barystyń» syrt aıdynda endi tórt oıyny qaldy. Sodan keıin Batys pen Shyǵys konferentsııasynyń árqaısysynan úzdik shyqqan segiz komanda pleı-off básekelerin jalǵastyrady.
