Hokkeı: «Barys» «Traktordan» basym tústi
ASTANA. QazAqparat - «Barys» Qurlyqtyq hokkeı lıgasyndaǵy kezekti oıynyn búgin Reseıde «Traktor» (Chelıabınsk) komandasyna qarsy ótkizdi, dep habarlaıdy QazAqparat tilshisi.
Qazaqstandyq komanda sońǵy on alty oıynda nebári úsh márte jeńiske jetti. Saldarynan týrnır kestesinde tómengi oryndarda keledi. «Traktor» komandasynda da dál osyǵan uqsas jaǵdaı. Olar da sátsiz oıynymen jankúıer kóńilinen shyǵa almaı júr.
Kezdesý barysynda «Barys» sapynan Mıhaıl Rahmanov 3-mınýtta esep ashty. Birinshi kezeńde odan basqa gol soǵylǵan joq.
Ekinshi kezeń bastalǵannan qazaqstandyq hokkeıshiler alǵa qaraı umtyldy. Nátıjesinde Ádil Beketaev 21, Aleks Grant 23-mınýttarda mergendik tanytty.
Al 28-mınýtta «Traktor» hokkeıshisi Mıhaıl Gorıýnov-Rolgızer esep aıyrmasyn qysqartsa, 53-mınýtta Ansar Shaıhmeddenov elordalyq klýbtyń basymdyǵyn arttyrdy.
Osylaısha elordalyq klýb qarsylasynan 4:1 esebimen basym tústi.
Endi «Barys» aldaǵy oıynyn 2 jeltoqsanda elordada Reseıdiń «Avtomobılıst» (Ekaterınbýrg) komandasyna qarsy ótkizedi.
Eske salsaq, budan buryn «Barys» «Avtomobılıst» komandasynan jeńilip qaldy.
Foto: sports.kz
