Hokkeı: «Barys» taǵy da iri eseppen jeńiske jetti
ASTANA. QazAqparat - Astananyń «Barysy» Qurlyqtyq hokkeı lıgasynyń (QHL) kezekti oıynyn Podolskide jergilikti «Vıtıaz» komandasymen ótkizip, 5:1 esebimen jeńiske jetti, dep habarlaıdy «QazAqparat» tilshisi.
«QHL» telearnasynan tikeleı efırde kórsetkenindeı, birinshi kezeńde 14-mınýtta aıdyn ıeleri (Aleksandr Pankov) aldymen esep ashty.
Ekinshi kezeńde san basymdylyǵyn sátti paıdalanǵan «Barystyń» kapıtany Naıdjel Doýs kanadalyqtar Mettıýn Frettın men Lınden Veıdiń kómegimen tarazy basyn teńestirdi. Áıtse de kóp uzamaı dóreki oınaǵan «Barystyń» qorǵaýshysy Aleksandr Lıpın match sońyna deıin aıdynnan qýyldy.
«Vıtıaz» komandasy bes mınýt boıy san basymdylyǵyna ıe bolyp, astanalyqtar úshin qıyn sátter týdy. Degenmen qonaqtar shvetsııalyq qaqpashy Henrık Karlssonmen birge sátti qorǵana bildi. Oǵan qosa úsh mınýtqa jeter-jetpeste aıdyn ıeleri de (Dmıtrıı Semın) tártip buzyp, oıynshylar sany teńesti. Ekinshi kezeń barysynda qonaqtardyń qarqyny kúshti ekenin baıqaǵan «Vıtıazdiń» bas bapkeri Valerıı Belov úzilis alyp, shákirtterine keńesin berip kórdi. Alaıda olarǵa bul da kómektespedi. Ekinshi kezeń bitýge nebári úsh sekýnd qalǵanda Maksım Semenovtan pas alǵan Nıkıta Mıhaılıs shaıbany qaqpaǵa dál baǵyttap, óz komandasyn alǵa shyǵardy.
Úshinshi kezeńde «Vıtıazdiń» qorǵaýshysy Evgenıı Katıchev dórekiligi úshin eki mınýtqa aıdynnan qýyldy. Elordalyqtar jarty mınýtqa jetkizbeı, bul múmkindikti de keremet paıdalanyp, Kevın Dallmen men Lınden Veıdiń pasynan keıin kanadalyq qorǵaýshy Darren Dıts esepti 3:1-ge jetkizip, bıylǵy maýsymdaǵy besinshi golyn soqty. Budan keıin aıdyn ıeleri san basymdylyǵyna ıe bolǵanymen, elordalyqtar jaqsy qorǵana aldy. Esesine «Barys» oıynshylary mundaı múmkindikti múlt jibermeı, N.Doýstyń pasynan keıin L.Veı tórtinshi goldyń avtory atandy. Kóp uzamaı qarymta shabýyl kezinde L.Veıdiń pasynan soń N.Doýs bıylǵy birinshiliktegi 12-inshi golyn soqty.
Munyń aldynda Rıgada «Dınamony» 6:0 esebimen tize búktirgen «Barys» bul joly da iri utysqa qol jetkizdi. Sóıtip elordalyqtar syrt aıdyndaǵy tórt matchynyń úsheýin jeńispen aıaqtady.
Osy týrdan keıin 19 upaı jınaǵan astanalyqtar Shyǵys konferentsııasynda burynǵysha kósh bastap keledi. Qazaqstandyq maman Evgenıı Koreshkovtyń shákirtteri kelesi kezdesýin 15 qyrkúıek kúni Astanada «Sıbır» (Novosibir) komandasymen ótkizedi.
