Hokkeı: «Barys» taǵy da iri eseppen utyldy
ASTANA. QazAqparat - Qurlyqtyq hokkeı lıgasynyń (QHL) kezekti oıynyn Astananyń «Barysy» ıAroslavl qalasynda jergilikti «Lokomotıvpen» ótkizip, 0:5 esebimen utylyp qaldy, dep habarlaıdy «QazAqparat» tilshisi.
«Lokomotıv» QHL-daǵy azýly komandalardyń biri ekendigi belgili. Sondyqtan aıdyn ıeleri birden shabýylǵa shyǵyp, «Barysty» tyqsyryp tastady. Bir mınýt óte bere Brendon Kozýn kózge tússe, 3-mınýtta Egor Averın esepti 2:0-ge jetkizdi. 15-mınýtta Egor Fateev úshinshi shaıbany soqty.
Ekinshi kezeńde Danııl Apalkov qos goldyń avtory atanyp, «Lokomotıvtiń» jeńetinine esh kúmán qaldyrmady.
Matchtyń sońǵy bóliginde esep ózgergen joq.
Osylaısha, astanalyqtar qatarynan alty oıynda jeńilis tapty. Onyń ústine sońǵy úsh oıynda qarsylastar qaqpasyna bir ǵana shaıba engizýi komandanyń shabýyl shebi álsirep qalǵandyǵyn kórsetedi.
Aıta keteıik, Shyǵys konferentsııasynda besinshi satyda turǵan «Barys» elordaǵa oralyp, 3 jeltoqsan kúni týrnır kestesinde ózin ókshelep kele jatqan «Metallýrg» (Magnıtogorsk), eki kúnnen keıin «Traktor» (Chelıabi) komandalaryn qabyldaıdy. Sodan soń tórt birdeı kezdesýin qaıtadan syrt aıdyndarda ótkizedi.
