Hokkeı: «Barys» syrt aıdynda «ıÝgra» komandasyn tize búktirdi
ASTANA. QazAqparat - Qurlyqtyq hokkeı lıgasynyń (QHL) kezekti kezdesýin Astananyń «Barysy» Hanty-Mansıısk qalasynda «ıÝgra» komandasymen ótkizip, 5:2 esebimen jeńiske jetti, dep habarlaıdy «QazAqparat» tilshisi.
«Qazsport» telearnasynan tikeleı efırde kórsetkenindeı, astanalyqtar bul joly da komanda kapıtany Naıdjel Doýs, Kevın Dallmen, Darren Dıtssiz oınasa da, matchty qarqyndy ótkizdi. Kezdesý bastalysymen-aq Talǵat Jaılaýov esep ashsa, 5-mınýtta Konstantın Pýshkarev mergendik tanytyp, 2:0-ge jetkizdi. Sodan keıin 18-mınýtta Mettıý Frettın san basymdylyǵyn paıdalansa, birinshi kezeń aıaqtalýǵa sanaýly sekýndtar qalǵanda, «ıÝgra» hokkeıshisiniń óreskel qateliginen keıin Vladımır Markelov qaqpaǵa jekedara shyǵyp, tórtinshi shaıbany soqty.
Ekinshi kezeńde Nıkıta Mıhaılıs esepti 5:0-ge deıin jetkizgenimen, aıdyn ıeleri de qarap qalǵan joq. Olar san basymdylyǵyn eki márte (gol avtorlary Ilıa Shıpov pen Maksım Pestýshko) paıdalana bildi. Úshinshi kezeńde esep ózgere qoıǵan joq.
Osylaısha, kezekti jeńisine qol jetkizgen «Barys» 35 upaımen Shyǵys konferentsııasynda tórtinshi orynǵa shyqty. E.Koreshkovtyń shákirtteri kelesi kezdesýin 14 qazanda Astanada «Kýnlýn Red Star» (Beıjiń) komandasymen ótkizedi.
