Hokkeı: «Barys» syrt aıdynda «Sıbır» komandasyn tize búktirdi
ASTANA. QazAqparat - Qurlyqtyq hokkeı lıgasynyń kezekti matchyn Novosibirde «Sıbır» komandasymen ótkizgen «Barys» overtaımda 2:1 esebimen jeńiske jetti, dep habarlaıdy QazAqparat tilshisi.
«Sıbır» QHL-da kósh sońynda kele jatqan klýb bolǵanymen, bul oıyn astanalyqtarǵa ońaıǵa túsken joq.
Oıyn tizginin birden qolǵa alǵan elordalyqtar alǵashqy bolyp 4-mınýtta-aq esep ashty. Roman Starchenkonyń kómegimen shvetsııalyq shabýylshy Andre Petersson qaqpadan sańylaý taba bildi.
Áıtse de aıdyn ıeleri ekinshi kezeńde san basymdylyǵyn paıdalanyp, Dmıtrıı Saıýstov tarazy basyn teńestirip ketti.
Oıyn barysynda «Barystan» áýeli kanadalyq shabýylshy Mettıý Frettın, sodan keıin komanda kapıtany Brendon Bochenskı jaraqat aldy. Bul da óz áserin tıgizbeı qalǵan joq.
Negizgi ýaqyt 1:1 esebimen teń aıaqtalǵannan keıin overtaımda taǵy bir kanadalyq Kertıs Valk (nátıjeli pas bergen Nıkıta Mıhaılıs) mergendik tanytyp, «Barysqa» jeńis áperdi.
Osylaısha Andreı Skabelkanyń shákirtteri qatarynan úsh márte jeńiske qol jetkizip, 39 upaımen QHL-dyń jalpy kestesinde besinshi, Shyǵys konferentsııasynda úshinshi orynǵa kóterildi.
«Barysqa» upaı qoryn tolyqtyra túsýine múmkindik mol. Óıtkeni aldaǵy úsh kezdesýin óz aıdynynda ótkizedi. Aldymen 14 qarashada «Amýr» (Habarovsk), 16-synda «Dınamo» (Máskeý), 18-inde «Salavat ıÝlaev» (Ýfa) komandasyn qabyldaıdy.
Eske sala keteıik, budan buryn astanalyqtardyń Shyǵys konferentsııasynda tórtinshi orynǵa kóterilgenin jazǵan bolatynbyz.
