Hokkeı: «Barys» syrt aıdynda «Neftehımıkti» tize búktirdi
ASTANA. QazAqparat - Qurlyqtyq hokkeı lıgasynyń (QHL) kezekti kezdesýinde Astananyń «Barysy» Nıjnekamsk qalasynda jergilikti «Neftehımık» komandasymen kúsh synasty, dep habarlaıdy «QazAqparat» tilshisi.
Kezdesý elordalyqtarǵa ońaıǵa túsken joq. Týrnır kestesinde 29 upaımen joǵary turǵan «Neftehımık» komandasyn «Barystyń» burynǵy bapkeri Andreı Nazarov jattyqtyratyndyqtan, onyń shákirtteri de jeńiske umtylyp baqty. Degenmen match barysynda astanalyqtar, ásirese, komanda kapıtany Naıdjel Doýs bastaǵan alǵashqy bestik tabysty oıyn órnegin kórsete bildi. 10-mınýtta ushqyr shabýyl kezinde Lınden Veıdiń pasynan keıin N.Doýs esep ashty.
Ekinshi kezeńde «Barystyń» qaqpashysy, shvetsııalyq Henrık Larsson tártip buzǵany úshin oıyn sońyna deıin aıdynnan qýyldy. Osyndaı qıyn sátte ony Sergeı Kýdrıavtsev sátti almastyra bildi. Astanalyqtardyń esepti ulǵaıtatyndaı múmkindikteri boldy. Áıtse de Pavel Akolzın eki márte múlt ketse, Talǵat Jaılaýovtyń soqqan shaıbasy qaqpa mańdaıshasynan qaıtty.
Úshinshi kezeńde eshqandaı nátıje shyǵara almaǵan aıdyn ıeleri match bitýge 2 mınýt qalǵanda qaqpashysyn oıynshymen aýystyrdy. Astanalyqtar sátti qorǵanyp, shaıba N.Doýsqa jetken mezgilde ol bos qalǵan qaqpany dál kózdedi. Sodan keıin mundaı múmkindikti Lınden Veı de múlt jibergen joq.
Osylaısha, 3:0 esebimen jeńiske jetken Evgenıı Koreshkovtyń shákirtteri Shyǵys konferentsııasynda 28 upaımen besinshi orynǵa kóterildi. «Barys» kelesi oıynyn 4 qazan, sársenbi kúni Mınskide jergilikti «Dınamo» komandasymen ótkizedi. «Dınamo» nebári 17 upaımen Batys konferentsııasynda 16-orynda keledi.
