Hokkeı: «Barys» syrt aıdynda «Kýnlýn Red Star» komandasyn oısyrata utty
ASTANA. QazAqparat - Qurlyqtyq hokkeı lıgasynda (QHL) sońǵy oıyndarynyń birin Astananyń «Barysy» Beıjińde «Kýnlýn Red Star» komandasymen ótkizip, 4:0 esebimen jeńiske jetti, dep habarlaıdy «QazAqparat» tilshisi.
Birinshi kezeńde esep ashylmasa, oıynnyń ekinshi bóliginde komanda kapıtany Naıdjel Doýs pen Dmıtrıı Shevchenko mergendikterimen kózge tústi.
Úshinshi kezeńde de qarqynyn tómendetpegen astanalyqtardan Roman Savchenko pen Dmıtrıı Gýrkov esepti 4:0-ge jetkizdi.
Osylaısha, 74 upaımen Shyǵys konferentsııasynda onynshy orynǵa ıe bolǵan astanalyqtar pleı-off básekesinen syrt qaldy. Qazirgi kezde Olımpıada oıyndaryna baılanysty QHL-da úzilis jarııalandy. Bıylǵy maýsymda «Barystyń» bir ǵana oıyny qaldy. 1 naýryz kúni Ǵalym Mámbetálıevtiń shákirtteri elordada «Avangard» (Omby) komandasyn qabyldaıdy. Biraq bul oıyn eshteńeni sheshpeıdi. «Barystaǵy» hokkeıshilerdiń kópshiligi Qazaqstan quramasynda oınaıtyndyqtan, endigi mindet - sáýir aıynda Vengrııa astanasy Býdapeshte ótetin birinshi dıvızıon komandalary arasynda ótetin álem chempıonatyna tyńǵylyqty daıyndalý. Onda qazaqstandyqtar elıtalyq topqa beriletin joldamany jeńip alý úshin baryn salatyn bolady.
