Hokkeı: «Barys» syrt alańda «Medvejchak» komandasyna jol berip qoıdy

Bul oıynǵa deıin Zagreb qalasynyń hokkeı klýby sońǵy eki matchta «SKA» (4:3 (B) men «ıÝgrany» (2:1) jeńgen bolatyn. Osy joly da onyń Shyǵys konferentsııasynyń favorıti - «Barys» komandasymen bolatyn oıynǵa ábden daıyndalǵany baıqaldy. Machtyń birinshi kezeńinde «Medvejchak» bir shaıbamen alǵa shyqty. Al ekinshi kezeńde esepti eseleı tústi. Biraq bir mınýt ótpeı, «Barys» tarazy basyn 1:2-ge deıin qysqartty. Ekinshi kezeńniń sońynda astanalyq klýbtyń hokkeıshileri erejeni jıi buza bastady. Sonyń saldarynan olarǵa aıyp ýaqyty belgilenip, eki hokkeıshige kem, ıaǵnı 3/5 formatynda oınaýǵa týra keldi. Qarsylastar ol múmkindikti qalt jibermedi, Úshinshi kezeńniń basynda bir hokkeıshige artyq oınap, «Barystyń» qaqpasyna taǵy bir shaıba salyp ketti. Esep - 1:3. Bes mınýttyń ishinde esep ózgerdi - 2:3. Osydan keıin «Medvejchak» qorǵanysqa kóship, tarazy basyn ustap qalýǵa tyrysty. «Barys» bolsa, shabýyldaryn údetip, qarsylasyna qyrǵıdaı tıdi. Sońǵy mınýttarda qaqpashyny alyp tastap, bir hokkeıshige artyq quramda da oınady. Sol kezde esepti teńestirý úshin tamasha múmkindikter boldy. Alaıda onyń barlyǵy iske aspady. Qorytyndy esep - 2:3.

Osylaısha, «Barys» qatarynan bes oıynda jeńiske jetip, altynshy matchta qarsylasyna jol berip qoıdy. «Medvejchak» bolsa, kezekti úshinshi matchta alǵyrlyq tanytyp, lıganyń aıtýǵa turarlyq taǵy bir komandasyn utty. Soǵan qaramastan, «Barys» Shyǵys konferentsııasynda kósh bastap, chempıonattyń jalpy týrnırlik kestesinde ekinshi ornyn saqtap qaldy.