Hokkeı: «Barys» syrt alańda «Dınamony» tize búktirdi
ASTANA. 1 qazan. QazAqparat - Astana qalasynyń «Barys» hokkeı klýby syrt alańda «Dınamo» (Mınsk) komandasyn jeńdi.
Oıynnyń bas kezinde «Barys» óz múmkindigin qalt jibergen joq. Qarsylastar erejeni buzyp, bir oıynshyǵa kem oınaǵanda, Talǵat Jaılaýov esep ashyp, óz komandasyn alǵa shyǵardy. Alaıda ekinshi kezeńde tarazy basy teńesti. Eki mınýt ótpeı, «Dınamo» da «Barystyń» bir hokkeıshige kem oınaǵanyn paıdalanyp, taǵy bir shaıbany soǵyp ketti. Esep - 1:2. «Mınsk-arena» sport keshenine jınalǵan jankúıerlerdiń qýanyshynda shek bolmady. Biraq kóp uzamaı, onyń bári sý sepkendeı basyldy. Brendon Bochenskı qatarynan eki shaıba soqsa, Roman Starchenko esepti 4:2-ge deıin jetkizdi. Al úshinshi kezeńniń aıaq jaǵynda B.Bochenkı úshinshi shaıbasyn salyp, het-trıktiń avtory atandy. Qorytyndy esep - 5:2.
Osy oıynnan keıin «Barys» lıganyń azýly komandalary - «Aq bars» (Qazan) pen «Dınamony» (Máskeý) artqa tastap, jalpy týrnırlik kestede ekinshi orynǵa kóterildi. Komandanyń úlesinde 24 upaı bar. Astanalyq klýbtan tek «SKA» (27 upaı) ǵana joǵary tur.
