Hokkeı: «Barys» sońǵy týrda «Avangardqa» ese jiberdi
NUR-SULTAN. QazAqparat - Qurlyqtyq hokkeı lıgasy aıasynda elordalyq «Barys» 27 aqpanda Reseıde «Avangard» (Omby) komandasymen kezdesti, dep habarlaıdy QazAqparat tilshisi.
Eki komanda arasyndaǵy sońǵy tórt oıynnyń úsheýinde qazaqstandyq klýbtyń mereıi ústem boldy.
«Barys» týrnır kestesinde 59 oıynnan keıin 69 upaımen 11-orynda keledi. Al «Avangard» 59 oıynnan keıin 82 upaı jınap, 4-orynda tur.
Komandalar pleı-off kezeńine shyǵý múmkindigine qol jetkizip qoıǵan bolatyn. Soǵan qaramastan búgingi oıyn tartysty ótti.
Esepti 2-mınýtta «Barys» oıynshysy Kırıll Panıýkov ashty. Al 16-mınýtta «Avangard» sapynan Ilıa Kovalchýk tarazy basyn teńestirdi.
Ekinshi kezeńniń 21-mınýtynda reseılik hokkeıshi Sergeı Tolchınskıı «Avangardty» alǵa shyǵardy. Al 41-mınýtta «Barys» hokkeıshisi Darren Dıts kózdegen nysanadan múlt ketken joq. Sergeı Tolchınskıı 42-mınýtta qaıtadan reseılik klýbtyń basymdyǵyn arttyrsa, Denıs Zernov esepti ústemeleı tústi. Al 59-mınýtta Sergeı Chınakov qorytyndy esepti belgiledi. Kezdesýde «Barys» qarsylasynan 2:5 esebimen jeńilip qaldy.
Esterińizge sala ketelik, budan buryn «Barys» Qytaıdyń «Kýnlýn Red Star» komandasynan basym tústi.
Búgin qurlyqtyq hokkeı lıgasy turaqty kezeńinde komandalar sońǵy týr oıyndaryn ótkizedi. Pleı-off kezeńi 2 naýryzda bastalady. Fınal -30 sáýirde.
