Hokkeı: «Barys» «SKA»-dan utylyp qaldy
ASTANA. 13 qyrkúıek. QazAqparat - Keshe Qurlyqtyq hokkeı lıgasynyń jańa maýsymy aıasynda «Barys» hokkeı klýby óz alańynda «SKA» (Sankt-Peterbor) komandasymen kezdesti.
Statıstıka boıynsha buǵan deıin atalǵan eki komanda on ret kezdesken. On matchtyń jeteýinde «SKA» komandasy jeńiske jetse, tek úsheýinde ǵana «Barystyń» mereıi ústem boldy. Ókinishke qaraı, bul joly sátsizdik taǵy jalǵasty. Oıynnyń birinshi kezeńinde qarsylastar esep ashsa da, «Barys» ony ile-shala teńestire bilgen edi. Alaıda, kóp uzamaı «SKA» taǵy da sýyrylyp alǵa shyqty. Esep - 1:2. Al ekinshi kezeńde bizdiń qaqpamyzǵa kirgen úsh birdeı shaıba jankúıerlerdiń eńsesin túsirdi. Degenmen úshinshi kezeńde bir shaıbany salýdyń reti keldi. Osymen oıyn da aıaqtaldy. Qorytyndy esep - 2:5.
Osy oıynnan keıin «SKA» taǵy úsh upaıdy oljalap, 12 upaımen týrnır kestesinde birden birinshi orynǵa kóterildi. «Barys» bolsa, 6 upaımen 12-shi orynǵa syrǵydy.
