Hokkeı: «Barys» «Sıbırden» taǵy jeńilip qaldy
ASTANA. QazAqparat - Qurlyqtyq hokkeı lıgasynyń (QHL) kezekti kezdesýin Astananyń «Barysy» Novosibirde jergilikti «Sıbır» komandasymen ótkizip, taǵy da jeńilis tapty, dep habarlaıdy «QazAqparat» tilshisi.
Bul kezdesýde aıdyn ıelerinen áýeli Stepan Sannıkov esep ashsa, sodan keıin Andreı Sıgarev 2:0-ge jetkizdi. Sosyn Talǵat Jaılaýov pen Anton Sagadeev mergendik tanytyp, tarazy basyn teńestirdi. Alaıda birinshi kezeń aıaqtalýǵa sanaýly sekýndtar qalǵanda, Andreı Ermakov «Sıbırdi» qaıtadan alǵa shyǵardy.
Matchtyń ekinshi bóligin astanalyqtar sátti ótkizdi. Aldymen komanda kapıtany Naıdjel Doýs, sodan soń Lınden Veı kózge túsip, «Barys» 4:3 esebimen alda turdy. Alaıda úshinshi, sheshýshi kezeńde novosibirlikter úsh márte san basymdylyǵyn (gol avtorlary - Maksım Ignatovıch, Ionas Enlýnd, Patrık Zakrısson) paıdalanyp, 6:4 esebimen jeńiske jetti.
Osylaısha, elordalyqtar bıylǵy chempıonatta «Sıbırge» tórtinshi ret ese jiberdi. Shyǵys konferentsııasynda ázirge tórtinshi orynda kele jatqan Evgenıı Koreshkovtyń shákirtteri kelesi oıynyn 25 qarasha kúni Qazanda Shyǵys konferentsııasynda 63 upaımen birinshi orynda turǵan «Aq Barys» komandasymen ótkizedi. «Barystyń» 27 qarasha kúngi qarsylasy, QHL-dyń eń tańdaýly klýby - Sankt-Peterbordyń SKA komandasy. Demek, bul básekelerde upaı alý asa qıynǵa túsedi.
