Hokkeı: «Barys» shveıtsarııalyq «Davosty» tize búktirdi
ASTANA. QazAqparat - Elordanyń «Barys» hokkeı klýby «Davospen» (Shveıtsarııa) joldastyq kezdesý ótkizip, 4:3 esebimen basym tústi, dep habarlady qazaqstandyq komandanyń baspasóz qyzmetinen.
Alǵashqy kezeńde qarsylastaryna 0:1 esebimen ese jibergen astanalyqtar oıynnyń ekinshi jıyrma mınýtynda Roman Savchenkonyń (Lakıza) arqasynda 1 shaıba saldy. Al osydan keıin shveıtsarııalyq qaqpashynyń osal tusyn dóp basqan Maık Landın (Dallmen) komandasyn alǵa shyǵardy. Degenmen, muz aıdyny qojaıyndary esepti teńestire aldy. Alaıda olar mundaı esepti uzaq ustaı almady. Evgenıı Rymarev (Bochenskıdiń pasymen) taǵy da «Barys» komandasyn alǵa jetelese, Konstantın Rýdenko (Pýshkarev) astanalyqtardyń jeńisin eseleı tústi. Biraq, sońǵy mınýtta «Davos» 1 shaıba salýǵa múmkindik aldy. Osylaısha, oıyn 4:3 esebimen qazaqstandyqtardyń paıdasyna sheshildi.
«Barys» Shveıtsarııadaǵy oqý-jattyǵý jıyny aıasynda jergilikti «Davos» komandasymen eki joldastyq kezdesý ótkizedi. «Davos» óńirdegi myqty komandalardyń biri sanalady. Ol - eldiń birneshe dúrkin chempıony, Shpengler kýbogynyń 15 márte ıegeri.
Eki komanda arasyndaǵy kelesi oıyn 3 tamyz kúni Sýrsı qalasynda Astana ýaqytymen saǵat 20:00-de bastalady.
