Hokkeı: «Barys» Roman Starchenkomen kelisimshartty uzartty

«Barys» hokkeı klýby málim etkenindeı, birjaqty kelisim 2 jylǵa jasalǵan.

R.Starchenko – Qurlyqtyq hokkeı lıgasy (QHL) qurylǵannan beri «Barys» sapynda óner kórsetip kele jatqan birden-bir oıynshy.

Ótken maýsymda pleı-ofty qosqanda, 33 jastaǵy shabýylshy 58 match ótkizip, 35 (18+17) upaı jınady. QHL-da onyń esebinde 634 oıynda barlyǵy 318 (176+142) upaı bar.

QHL-daǵy «Barys» tarıhyndaǵy mergender kóshinde R.Starchenko Naıdjel Doýs (217) pen Brendon Bochenskııden (179) keıin úzdik úshtikti túıindep tur. Onyń jańa maýsymda-aq B.Bochenskııdi basyp ozatyndaı múmkindigi bar.

R.Starchenkonyń Qazaqstan ulttyq quramasynyń bedeldi oıynshylarynyń biri ekendigi belgili. Jýyrda Halyqaralyq hokkeı federatsııasy Qazaqstannyń álem chempıonattarynyń elıtalyq dıvızıonyndaǵy kórsetkishterin saralaı otyryp, eń úzdik quramdy jarııa etti. Buǵan qaqpashy Vıtalıı Eremeev, qorǵaýshylar Evgenıı Paladev pen Alekseı Troşınskıı, shabýylshylar Talǵat Jaılaýov, Nıkolaı Antropov jáne Evgenıı Koreshkov kirdi. Federatsııa sonymen qatar qaqpashy Vıtalıı Kolesnık, qorǵaýshy Kevın Dallmen, shabýylshylar Erlan Saǵymbaev pen Roman Starchenkonyń da esimderin atap ótti.

«Barys» klýby munyń aldynda Anton Nekrıach, Arkadıı Shestakov, Ivan Vereşagın syndy oıynshylarmen kelisimshartty uzartqan bolatyn.

1 mamyr kúni QHL-da transferlik tereze ashylyp, «Barystan» birneshe beldi hokkeıshiniń ketkeni belgili boldy. Atap aıtqanda, qaqpashy Eddı Paskýale men qorǵaýshy, álem chempıony Atte Ohtamaa «Lokomotıv» (ıAroslavl) klýbynyń qataryn tolyqtyrsa, shabýylshy Korben Naıt ombylyq «Avangardqa» ketti.

Bıyl «Barystan» qol úzgen Belarýs mamany Andreı Skabelkanyń osy «Lokomotıvtiń» tizginin ustaıtyny aıtylýda. Sondyqtan elordalyq klýbqa jańa bas bapker men tyńnan basqa da oıynshylardyń keletini anyq.

Eske sala keteıik, budan buryn Andreı Skabelkanyń «Barystyń» bas bapkeri qyzmetinen ketkenin jazǵan bolatynbyz.