Hokkeı: «Barys» Rıganyń «Dınamosyn» jeńdi
ASTANA. QazAqparat - Qurlyqtyq hokkeı lıgasynyń kezekti matchynda elordanyń «Barysy» óz aıdynynda Rıganyń «Dınamo» komandasyn qabyldady, dep habarlaıdy QazAqparat tilshisi.
Astanalyqtar buǵan deıingi 13 oıynnan keıin 18 upaımen Shyǵys konferentsııasynda jetinshi orynda kele jatsa, rıgalyqtardyń qarqyny olardan tómendeý. «Dınamo» 14 matchtan keıin 13 upaı jınap, Batys konferentsııasynda nebári segizinshi orynda turǵan-dy.
«Barys» bul básekeni birden qarqyndy bastap, ekinshi mınýtta-aq esep ashty. Aıdynǵa ekinshi bestik shyqqan mezette Konstantın Klımontov pen Kertıs Valktyń pasynan keıin qaqpaǵa qaraı umtylǵan Nıkıta Mıhaılıs mergendik tanytty - 1:0.
Birinshi kezeń negizinen «Barystyń» basymdylyǵymen ótkenimen, esep ózgere qoıǵan joq.
Ekinshi kezeńde elordalyq klýb quramynan qos hokkeıshi birinen soń biri aıdynnan qýylyp, naǵyz synalar sát týdy. «Barystan» úsh oıynshy «Dınamonyń» bestigine qarsy turýyna týra keldi. Degenmen qaqpashy Henrık Karlsson bastaǵan qorǵanys shebi qonaqtardyń shabýylyna tótep berdi.
«Barys» uıymdastyrǵan shabýyldardyń barysynda komanda kapıtany Brendon Bochenskı, Darren Dıtsterge sál-pál sáttilik jetispese, keı tustarda «Dınamonyń» qaqpashysy Krısters Gýdlevskıs senimdi oınady.
Ekinshi kezeń aıaqtalýǵa 41 sekýndtaı qalǵanda, keremet kombınatsııadan keıin Alekseı Maklıýkovtyń pasyn paıdalanǵan taǵy bir qorǵaýshy Darren Dıts esepti 2:0-ge jetkizdi.
Úshinshi kezeń bel ortasynan aýǵanda, 53-mınýtta Djessı Blekerdiń pasynan keıin Kevın Dallmannyń alystan soqqan shaıbasyn Roman Starchenko túzetip jiberip, qaqpadan bir-aq shyǵardy - 3:0.
H.Karlsson óz qaqpasynyń kiltin jaqsy ustaǵanymen, 57-mınýtta Lınýs Vıdelldiń soqqan shaıbasyn toıtara almady - 3:1. Budan keıin qonaqtar qaqpashysyn altynshy oıynshyǵa almastyryp, shabýyldap baqqanymen, odan eshteńe shyǵa qoıǵan joq.
Osylaısha «Barys» 3:1 esebimen jeńiske jetti. Munyń aldynda, 7 qazan kúni astanalyqtar Chehııanyń «Slovan» komandasyn 3:0 esebimen tize búktirgen bolatyn.
Bul jeńisten keıin 20 upaı jınaǵan elordalyqtar Shyǵys konferentsııasynda altynshy, QHL-dyń jalpy týrnır kestesinde toǵyzynshy orynǵa kóterildi. Ár konferentsııadan úzdik segiz komanda pleı-off básekelerine joldama alatynyn eskersek, «Barystyń» bıylǵy qarqyny ázirge jaqsy deýge bolady.
Aıta keteıik, budan keıin «Barystyń» syrt aıdyndaǵy serııasy bastalady. Andreı Skabelkanyń shákirtteri 14 qazanda Ombyda «Avangardpen», eki kúnnen keıin Ekaterınbýrgta «Avtomobılıspen», 18 qazanda Chelıabide «Traktormen» shaıqasady. Bulardyń bári de osal komanda emes. Ásirese, «Avtomobılıst» pen «Avangard» QHL-dyń týrnır kestesinde kósh bastap keledi. Sodan soń elordalyqtar Astanaǵa oralyp, bes birdeı match ótkizedi.
