Hokkeı: «Barys» Rıgada «Dınamo» komandasyn tize búktirdi
ASTANA. QazAqparat - Qurlyqtyq hokkeı lıgasynyń turaqty chempıonatynda Astananyń «Barysy» Rıgada jergilikti «Dınamo» komandasyn 3:2 esebimen utty.
Chempıonat.kom saıtynan alynǵan málimetke qaraǵanda, tartysty ótken kezdesýde Naıdjel Doýs esep ashsa, rıgalyq Kaspars Saýlıetıs tarazy basyn teńestirdi. Oıynnyń ekinshi kezeńi de 1:1 esebimen aıaqtaldy. Bul joly «Barystan» Dastın Boıd, «Dınamodan» Gınts Meııa kózge tústi. Úshinshi kezeńde «Barystyń» kapıtany Brendon Bochenskı jeńis golyn soǵyp, astanalyqtar mańyzdy úsh upaıǵa ıe boldy.
Bul týrda «Barystyń» negizgi qarsylastary da jeńiske jetti. «Avtomobılıst» Máskeýde «Spartakty» 4:2 esebimen qapy qaldyrsa, «Neftehımık» (Nıjnekamsk) óz aıdynynda Mınskiniń «Dınamosyn» overtaımda (3:2) utyp, eki upaıǵa qol jetkizdi. 58 oıynnan keıin «Avtomobılıst» 88 upaımen Shyǵys konferentsııasynda jetinshi orynǵa nyq ornyqty. Al 83 upaıy bar «Barys» «Neftehımıkpen» segizinshi, toǵyzynshy oryndy bólisýde. Endi «Barystyń» turaqty chempıonatta eki-aq oıyny qaldy. 16 aqpanda Qazanda «Ak Bars», 18 aqpanda Ombyda «Avangardpen» kúsh synasady. Bulardyń ekeýi de myqty komanda ekendigin eskersek, «Barystyń» pleı-off básekelerine qatysýǵa múmkindik beretin alǵashqy segizdikke iligýi asa qıynǵa túsedi. Aıta keteıik, negizgi qarsylasy «Neftehımık» 16 aqpanda Tolıattıde «Ladamen», odan keıin 18 aqpanda óz aıdynynda «Salavat ıÝlaev» (Ýfa) komandasymen sheberlik baıqasady.
