Hokkeı: «Barys» reseılik «Metallýrgten» taǵy da jeńildi
NUR-SULTAN. QazAqparat - Qurlyqtyq hokkeı lıgasy aıasynda elordalyq «Barys» búgin, 7 aqpanda Reseıde «Metallýrg» (Magnıtogorsk) komandasymen kezdesti, dep habarlaıdy QazAqparat tilshisi.
Aıta keteıik, eki komanda buǵan deıin bıylǵy týrnırde úsh márte kezdesti. 2020 jyldyń 17 qarashasynda elordada «Metallýrg» býllıtten 2:1 esebimen basym tússe, 30 jeltoqsanda «Barys» overtaımda atalǵan qarsylasyn 3:2 esebimen tize búktirdi. Odan keıin 3 aqpanda reseılik klýb óz aıdynynda qazaqstandyq klýbty 3:1 esebimen tize búktirdi. Osylaısha «Barys» atalǵan qarsylasyna sońǵy eki oıynda ese jiberip qoıdy.
Sol ketken eseni búgin qaıtarýǵa tyrysty. Degenmen esepti alǵashqy bolyp reseılik hokkeıshiler ashty. Oıynnyń 20-mınýtynda Sergeı Plotnıkov mergendigimen kózge tústi. Oǵan ekinshi kezeńniń 22 jáne 38-mınýttarynda «Barys» hokkeıshisi Fıl Varone eki shaıbamen jaýap qaıyrdy. Osylaısha qazaqstandyq komanda alǵa shyqty.
Úshinshi kezeńde «Metallýrg» sapynan aldymen Sergeı Plotnıkov 46-mınýtta gol soqsa, odan keıin Nıkolaı Kýlemın 50-mınýtta kózdegen nysanadan múlt ketken joq. Reseılik klýb «Barystan» 3:2 esebimen basym tústi.
Endi «Barys» 16 aqpanǵa deıin úzilis aldy. Sol kúni elordada Reseıdiń «Avangard» komandasyn qabyldaıdy.
Esterińizge sala ketelik, «Barys» budan buryn Reseıde «Sıbır» komandasynan basym tústi.
