Hokkeı: «Barys» Reseıde «Sochı» komandasyna ese jiberdi

NUR-SULTAN. QazAqparat - Elordalyq «Barys» Qurlyqtyq hokkeı lıgasyndaǵy kezekti oıynyn Reseıde «Sochı» klýbyna qarsy ótkizdi, dep habarlaıdy QazAqparat tilshisi.

Eki komanda da bıylǵy týrnırdi sátsiz bastady. Týrnır kestesinde úsh oıynnan bir upaıǵa qol jetkizgen «Barys» 20-orynda kele jatqan bolatyn. Al úsh oıynnan keıin upaı almaǵan «Sochı» 22-oryndy mise tutty.

Kezdesý tartysty bastaldy. Oıynnyń nebári 11 sekýndynda «Barys» hokkeıshisi Kırıll Savıtskıı esep ashty. Odan keıin «Sochı» sapynan Artýr Tıanýlın 9, Nıkıta Feoktıstov 10, Artem Nıkolaev 16-mınýttarda úsh shaıba soǵyp ketti.

Ekinshi kezeńde qazaqstandyq komanda oıynshylary shıraq qımyldaı bildi. Nátıjesinde Kırıll Savıtskıı 22-mınýtta taǵy bir márte kózdegen nysanadan múlt ketken joq.

Al úshinshi kezeńniń alǵashqy mınýttarynda reseılik komanda belsendi boldy. Olardyń qatarynan Eor Babenko 41, Artýr Tıanýlın 42, Kırıll Petkov 43-mınýttarda úsh shaıba soǵyp ketti.

Osylaısha «Barys» qarsylasyna 3:6 esebimen ese jiberdi.

Eske salsaq, budan buryn elordalyq klýb úsh oıynda qarsylastaryna ese jiberip qoıdy.

Endi «Barys» elordada 13 qyrkúıekte «Traktor» (Chelıabınsk) komandasyn qabyldaıdy.