Hokkeı: «Barys» Reseıde máskeýlik «Dınamodan» jeńildi

ASTANA. QazAqparat – «Barys» Qurlyqtyq hokkeı lıgasyndaǵy kezekti oıynyn búgin Reseıde «Dınamo» (Máskeý) komandasyna qarsy ótkizdi, dep habarlaıdy QazAqparat tilshisi.

Týrnır kestesinde komandalar jaǵdaıy ártúrli. Reseılik aldyńǵy bestikte kele jatsa, qazaqstandyq komanda ázirge pleı-off satysyna shyǵatyn ujymdar qataryna kire almaı júr. Sol sebepti «Barys» úshin árbir oıynda jeńiske jetýdiń mańyzy artyp tur.

Kezdesý barysynda esepti qazaqstandyq Nıkıta Mıhaılıs 6-mınýtta ashqan edi. Odan keıin «Dınamo» hokkeıshisi Djordan Ýıl 8-mınýtta tarazy basyn teńestirdi.

Ekinshi kezeńde komandalar bir-biriniń qaqpasynan sańylaý tapty. Aldymen reseılik Maksım Djıoshvılı 24-mınýtta «Dınamony» alǵa shyǵarsa, oǵan qazaqstandyq komandadan Dmıtrıı Shevchenko 29-mınýtta bir golmen jaýap qaıyrdy. Al 38-mınýtta Egor Martynov reseılik klýbty taǵy da alǵa shyǵardy.

Osylaısha, elordalyq klýb qarsylasyna 2:3 esebimen jol berdi.

Endi «Barys» aldaǵy oıynyn 5 aqpanda Reseıde TsSKA (Máskeý) komandasyna qarsy ótkizedi.

Eske salsaq, budan buryn «Barys» Reseıde «Ak Bars» komandasynan jeńildi.