Hokkeı: «Barys» pleı-offta «Metallýrgke» ese jiberdi
NUR-SULTAN. QazAqparat - Qurlyqtyq hokkeı lıgasynyń pleı-off satysynda elordalyq «Barys» búgin Reseıde «Metallýrg» (Magnıtogorsk) komandasymen besinshi oıynyn ótkizdi, dep habarlaıdy QazAqparat tilshisi.
Búgingi kezdesýde reseılik komandanyń basymdyǵy baıqalyp turdy. Alǵashqy mınýttan oıyn tizginin qolyna alýǵa tyrysty. Nátıjesinde «Metallýrg» sapynan Sergeı Mozıakın 2, Nıkolaı Prohorkın 15, Nıkolaı Goldobın 27-mınýttarda mergendik tanytty.
Oǵan 30-mınýtta «Barys» hokkeıshisi Kertıs Valk bir shaıbamen jaýap berdi. Budan keıin qazaqstandyq komanda qaqpasyna eki gol jiberip aldy. Ony reseılik klýb sapynan Teılor Bek 35, Dennıs Rasmýssen 36-mınýttarda ózderiniń enshisine jazdy.
Kezdesýde «Barys» qarsylasyna 1:5 esebimen ese jiberdi. Osylaısha reseılik klýb oıyndar serııasynda 3:2 esebimen alǵa shyqty.
Jarys talaby boıynsha pleı-off kezeńiniń shırek fınalynda eki komandanyń bireýiniń tórt jeńisine deıin sozylady. Aldaǵy eki kezdesýde bir komanda jeńister sanyn tórteýge jetkizse, jarystyń kelesi satysyna shyǵýyna múmkindik alady.
Endi eki komanda 12 naýryzda elordada taǵy bir oıyn ótkizedi. Bul kezdesýde «Barys» jeńiske jetken jaǵdaıda oıyndar serııasynda esep teńesedi. Bul juptaǵy jeńimpazdy anyqtaý maqsatynda 14 naýryzda komandalar taǵy bir márte sheberlik baıqasady.
