Hokkeı: «Barys» óz aıdynynda Nıjnıı Novgorodtyń «Torpedosyn» tize búktirdi (FOTO)
ASTANA. QazAqparat - Qurlyqtyq hokkeı lıgasynyń turaqty chempıonatynda óz aıdynynda Nıjnıı Novgorodtyń «Torpedo» komandasyn qabyldaǵan «Barys» 5:2 esebimen jeńiske jetti.
Birden aıtý kerek, bul oıyn barysynda astanalyqtar bir oıynshynyń artyqtyǵyn sátti paıdalandy. Mysaly, birinshi kezeń aıaqtalýǵa 21 sekýnd qalǵanda, Dastın Boıd esep ashty. Sodan keıin 25-mınýtta Maık Landın sondaı sátti qur jibergen joq. Osy goldan soń aıdyndaǵy oıynshylar sany teńeskenmen, 45 sekýnd óter-ótpeste Konstantın Romanov esepti 3:0-ge jetkizdi. Degenmen qonaqtar da berile qoıǵan joq, ekinshi kezeńde-aq Artem Alıaev pen Maksım Osıpov mergendik tanytyp, esepti 3:2-ge deıin qysqartty. Úshinshi kezeńde aıdyn ıeleri (Konstantın Pýshkarev) taǵy da bir oıynshynyń artyqtyǵyn paıdalana bildi. Matchtyń sońǵy sátterinde Dastın Boıd bos qalǵan qaqpaǵa jekedara shyǵyp, kezdesýdiń núktesin qoıdy.
Sóıtip Andreı Nazarovtyń shákirtteri sońǵy jeti oıyndaǵy altynshy jeńisine qol jetkizdi. Qazirgi kezde 51 kezdesýden keıin 75 upaı jınaǵan «Barys» Shyǵys konferentsııasynda burynǵysha jetinshi orynda keledi. Astanalyqtardyń pleı-off básekesine shyǵýdaǵy negizgi qarsylastary «Neftehımık» (Nıjnekamsk) pen «Avtomobılıst» (Ekaterınbýrg) 50 oıynnan soń sáıkesinshe 72 jáne 71 upaımen segizinshi, toǵyzynshy satylarda tur.
Áli toǵyz oıyny qalǵan «Barys» 19 qańtar kúni Astanada Batys konferentsııasynda 50 matchtan keıin 68 upaımen 10-ynshy orynda kele jatqan Mınskiniń «Dınamo» komandasyn qabyldaıdy.
