Hokkeı: «Barys» óz aıdynynda Máskeýdiń «Dınamosynan» utyldy
ASTANA. QazAqparat - Qurlyqtyq hokkeı lıgasynyń (QHL) kezekti oıynynda Astananyń «Barysy» óz aıdynynda Máskeýdiń «Dınamo» komandasyn qabyldap, 3:5 esebimen utylyp qaldy, dep habarlaıdy «QazAqparat» tilshisi.
Matchtyń birinshi kezeńinde qonaqtar ábjildik tanytyp, 5-mınýtta Nıkıta Komarov alǵashqy bolyp esep ashty. Ekinshi kezeńde 25-mınýtta astanalyq Konstantın Pýshkarev tarazy basyn teńestirdi. 31-mınýtta Martınsh Karsýms «Dınamony» alǵa shyǵarsa, 5-mınýttan keıin «Barystyń» kapıtany Naıdjel Doýs esepti qaıta teńestirdi. Alaıda eki mınýt óter-ótpeste «Barystyń» burynǵy oıynshysy Dastın Boıd «Dınamoǵa» bir gol syılady.
Úshinshi kezeń basynda astanalyqtar san basymdylyǵyna ıe bolǵanymen, N.Doýstyń soqqysyn «Dınamo» qaqpashysy Ivan Bocharov qaıtardy. Degenmen kóp uzamaı, 48-mınýtta Naıdjel Doýs qaqpa aldyndaǵy qarbalas sátti tıimdi paıdalanyp, osy kezdesýdegi ekinshi golyn soqty. Biraq máskeýlikter de qarap qalmaı, Andreı Alekseev mergendik tanytty. Sosyn Danııl Tarasov bos qalǵan qaqpaǵa shaıbany súńgite salyp, esepti 5:3-ke jetkizdi.
Aıta keteıik, Evgenıı Koreshkovtyń shákirtteri kelesi oıynyn «Barys-Arenada» 25 qyrkúıek kúni QHL-da kósh bastap kele jatqan SKA (Sankt-Peterbor) komandasymen ótkizedi.
