Hokkeı: «Barys» óz aıdynynda «Ladany» tize búktirdi
ASTANA. QazAqparat - Qurlyqtyq hokkeı lıgasynyń (QHL) kezekti oıynyn Astananyń «Barysy» óz aıdynynda Tolıattıdiń «Lada» komandasymen ótkizip, 4:3 esebimen jeńiske jetti, dep habarlaıdy «QazAqparat» tilshisi.
Bul kezdesýdiń barysynda judyryqtasý da oryn alyp, barynsha tartysty ótti. Birinshi mınýtta-aq kópten qanjyǵasy maılanbaǵan «Barystyń» kapıtany Naıdjel Doýs esep ashty.
Oıynnyń ekinshi kezeńinde «Lada» da qarap qalmaı, Aleksandr Streltsov tarazy basyn teńestirdi. Degenmen kóp uzamaı Maksım Semenov aıdyn ıelerin qaıta alǵa shyǵardy.
Úshinshi, sheshýshi kezeńde tolıattılik Vladımır Jýravlev esepti qaıta teńestirdi. Sosyn Roman Starchenkonyń golyna «Ladadan» Kırıll Kapýstın jaýap berdi. Aqyry 57-mınýtta N.Doýs jeńis golyn soqty.
Osynyń aldynda astanalyqtar Ekaterınbýrgte kútpegen jerden jergilikti «Avtomobılıstiń» aldyn orap ketken bolatyn. Odan buryn toǵyz match qatarynan utylǵan «Barys» komandasy endi qansha umtylyp baqsa da, Shyǵys konferentsııasynda pleı-off básekelerine qatysýǵa múmkindik beretin úzdik segiz komandanyń qataryna qosyla almaıdy.
Aıta keteıik, qazirgi kezde 70 upaımen Shyǵys konferentsııasynda onynshy orynda kele jatqan Ǵalym Mámbetálıevtiń shákirtteri 23 qańtar kúni óz aıdynynda sol «Avtomobılıst» komandasyn qabyldaıdy.
