Hokkeı: «Barys» óz alańynda utylyp qaldy
ASTANA. 30 qyrkúıek. QazAqparat - Keshe Qurlyqtyq hokkeı lıgasy aıasynda óner kórsetip júrgen astanalyq «Barys» klýby óz alańynda «Metallýrg» (Novokýznetsk) hokkeıshilerimen kezdesti.
Oıyn barysynda «Barys» hokkeıshilerin qaıta-qaıta aıyp ornyna otyrǵyzý nátıjesinde elordalyq komanda azshylyq quramda jeńilis tapty. Atap aıtqanda, tartysty dodanyń birinshi kezeńinde, ıaǵnı alǵashqy jıyrma mınýtynda astanalyq hokkeıshiler qonaqtardan basymdyqtaryn kórsetip, esep ashty. Alaıda, keıingi eki kezeńde «Barystyń» azshylyq quramdaǵy sátin paıdalanyp, «Metallýrg» hokkeıshileri 5 shaıba salyp, alǵa ozdy. Sonymen oıyn nátıjesi 1:5 esebimen qonaqtardyń paıdasyna sheshildi.
Endi «Barys» óz alańynda 1 qazan kúni «Amýr» komandasyn qabyldaıdy.
