Hokkeı: «Barys» óz alańynda «Avtomobılısti» oısyrata utty

Oıyn «Barystyń» tegeýrindi shabýyldarynan bastaldy. Barlyq hokkeıshiler alǵa umtylyp, qorǵanys shebin umytqandaı boldy. Osy múmkindikti sheber paıdala bilgen «Avtomobılıstiń» hokkeshileri oıynnyń jetinshi mınýtynda bir shaıba, al taǵy qyryq sekýndtan keıin ekinshi shaıbany soǵyp ketti. Mundaı oıyndy kórgen «Barystyń» bas bapkeri Arı Selın Pekka taımaýt alyp, óz shákirtterin bir «silkip» aldy. Sodan alty mınýt ótpeı, Roman Starchenko esep aıyrmasyn bir shaıbaǵa qysqartsa, kóp uzamaı, Talǵat Jaılaýov tarazy basyn teńestirdi. Birinshi kezeńniń qorytyndysy boıynsha esep - 2:2. Budan keıingi kezeńderde qarsylastar astanalyq klýbtyń qorǵanysyn buza almady. «Barys» bolsa, «Avtomobılıstiń» qaqpashysyn ekinshi kezeńde eki ret, al úshinshi kezeńde úsh márte qapy qaldyryp, esepti 7:2-ge deıin jetkizdi. Bul matchta T.Jaılaýov pen R.Starchenkonyń dýbl, ıaǵnı eki birdeı shaıbanyń avtory atanǵanyn erekshe atap ótken jón.

Bul oıynnan keıin «Barys» taǵy úsh upaıǵa ıe bolyp, Qurlyqtyq hokkeı lıgasynyń jalpy týrnırlik kestesinde 18 upaımen ekinshi orynǵa kóterildi. Onyń úlesinde qarsylastyń qaqpasyna soqqan 40 shaıba bar. Ázirshe, bul - lıga boıynsha eń úzdik kórsetkish. Máselen, qazirgi favorıt «SKA» (Sankt-Peterbor) komandasynda 33 shaıba bar.