Hokkeı: «Barys» óz alańynda "Avangardtan" utylyp qaldy
ASTANA. 26 qarasha. QazAqparat /Rýslan Ǵabbasov/ - Keshe elordadaǵy «Qazaqstan» sport saraıynda Qurlyqtyq hokkeı lıgasy aıasyndaǵy taǵy bir oıyn ótti.
Astananyń «Barys» komandasy Ombynyń «Avangardyn» qabyldady. 2 qarashada astanalyq komandamen bolǵan dodada ombylyqtar jeńilis tapqan edi, al keshegi kezdesýde kerisinshe qonaqtar basym tústi. Esep 0:3.
Oıynnyń birinshi kezeńinde astanalyq komandanyń oqtyn-oqtyn shabýyldary qarqyndy bolǵanymen shaıba salýdyń reti kelmedi. Bul jerde jankúıerler qonaqtardyń qaqpashysynyń sheberligine tańdaı qaǵýmen boldy. Ol shaıbany doptaıaqpen tejeýmen qoımaı, birneshe márte shaıbany qolmen de qaǵyp alyp, jaqsy oıyn órnegin kórsete bildi. Alaıda, keshegi dodanyń 2-kezeńinde de qos komanda esep ashýǵa qaýqarly bolmady. Tek úshinshi kezeńde ombylyqtar qatarynan úsh shaıba salyp, bul tartysty jeńispen túıindedi. Oıyn 0-3 esebimen «Avangard» komandasynyń utysymen aıaqtaldy.
Qos komandanyń kezdesýinen keıingi baspasóz máslıhatynda astanalyq hokkeıshilerdiń bas jattyqtyrýshysy Andreı Homýtov oıynshylardyń shabýylyn áli de shyńdaý kerektigin atap ótti. «Oıyn óte jyldam boldy. Jigitterdiń barlyǵy tyrysyp-aq oınady. Alaıda meniń oıymsha, biz budan burynǵy qatelikterimizdi qaıtalap otyrmyz, ıaǵnı shabýyl kezinde qaqpaǵa shaıba qaǵý sátteri az sekildi. Sondyqtan gol salýda kemshilikter oryn aldy. Atap aıtqanda, qaqpaǵa baǵyttalǵan shaıba neǵurlym kóp bolsa, osyǵan sáıkes esep ashý múmkindigi de joǵary. Sondyqtan osy baǵytta áli de jumys isteý qajettilik etedi»,- dedi ol.
«Barys» komandasy kelesi oıynyn 29 qarashada Cherepovets qalasynda «Severstal» komandasymen ótkizedi.
