Hokkeı: «Barys» overtaımda «Torpedodan» utylyp qaldy
ASTANA. QazAqparat - Qurlyqtyq hokkeı lıgasynyń kezekti oıynyn Astananyń «Barysy» Nıjnıı Novgorodta jergilikti «Torpedo» komandasymen ótkizdi, dep habarlaıdy QazAqparat tilshisi.
«Torpedo» osyǵan deıingi úsh kezdesýinde jeńiske jetip, QHL-daǵy kósh bastaýshy komandalardyń biri bolǵanymen, Belarýs mamany Andreı Skabelka jattyqtyratyn astanalyqtar matchty qarqyndy bastap, birinshi kezeńniń aıaǵyna taman 2:0 esebimen alǵa shyqty.
Aldymen san basymdylyǵyn paıdalanǵan Roman Starchenko 17-mınýtta esep ashty. Arada bir mınýt óter-ótpeste Dmıtrıı Shevchenkonyń pasynan keıin «Barystyń» jas shabýylshysy, 22 jasar Álıhan Ásetov mergendik tanytty.
Ekinshi kezeń bastalysymen «Barysqa» bıyl qaıtyp oralǵan komanda kapıtany Brendon Bochenskı (pas bergen Maksım Semenov) 21-mınýtta shaıbany torda týlatyp, esepti 3:0-ge jetkizdi. Sol boıda «Torpedo» komandasynyń bas bapkeri, kanadalyq Devıd Nemırovskı oıyny júrmegen qaqpashy Denıs Kostınniń ornyna Andreı Tıhomırovty shyǵardy. «Barystyń» qaqpasyn úshinshi match qatarynan Henrık Karlsson qorǵady.
Ekinshi kezeń bel ortasynan aýa bere aıdyn ıeleri oıyn tizginin qolǵa aldy. Aldymen 31-mınýtta Danııl Ilın esepti qysqartty. Budan keıin astanalyqtardan Kırıll Polohov, Valerıı Orehov, Dmıtrıı Shevchenko birinen soń biri aıdynnan qýylyp, jaǵdaı qıyndaı tústi. Degenmen dál osyndaı sátte qaqpashymen jekedara shyqqan Anton Sagadeev óz múmkindigin paıdalana almady. Bir oıynshysy kem kezde elordalyqtar qorǵana bilgenimen, Damır Jafıarov ushqyr shabýyldan keıin 37-mınýtta Pavel Makarenkonyń kómegimen dál soqqy jasaı bildi - 2:3.
Úshinshi, sheshýshi kezeń hokkeıshilerdiń shekisýimen bastaldy. «Torpedo» oıynshysy Kırıll Ýrakov tártip buzyp qana qoımaı, sony «jýyp-shaıǵysy» kelgendeı, judyryǵyn ala júgirdi. «Barys» san basymdylyǵyna ıe bolǵanymen, ony paıdalana almady. Budan soń D.Jafıarov aıdynnan qýyldy. Qaqpa aldyndaǵy qarbalas sátti 44-mınýtta Roman Starchenko múlt jibergen joq - 4:2. Bul Romannyń bıylǵy maýsymdaǵy tórtinshi, osy oıyndaǵy ekinshi goly edi.
Іle-shala «Torpedo» quramyndaǵy kanadalyq legıoner Endrıý Kelof keri serpilgen shaıbany qaqpaǵa toǵyta saldy.
Astanalyqtar da qarap qalmaı, kanadalyq Darren Dıts pen shvetsııalyq Andre Peterssonnyń kómegimen taǵy bir kanadalyq Patrıs Korme 47 mınýtta esepti 5:3-ke jetkizdi.
«Barystyń» qorǵaýshysy Kevın Dallman aıdynnan qýylǵan sátte «Torpedodan» 52-mınýtta Vladımır Galýzın mergendik tanytsa, bir mınýt óter-ótpeste Endı Mılı tarazy basyn teńestirip úlgerdi - 5:5. Jergilikti hokkeıshiler qarqynyn údete túsip, astanalyqtar kóbirek qorǵanýǵa májbúr boldy.
Osylaısha negizgi ýaqyt teń aıaqtalyp, match overtaımǵa ulasty.
Qosymsha ýaqytta «Barys» sapyndaǵy kanadalyq shabýylshy Kertıs Valk tártip buzyp, komandasyn qıyn jaǵdaıda qaldyrdy. Muny E.Kelof múlt jibermeı, qos goldyń avtory atanyp, «Torpedo» komandasyna jeńis áperdi.
Bul kezdesýde elordalyq oıynshylar kóbirek tártip buzbaǵanda, jeńiske jetetin múmkindikteri de mol edi.
Eske sala keteıik, astanalyqtar jańa maýsymdy sátti bastap, 5 qyrkúıekte Nıjnekamsk qalasynda «Barysty» buryn jattyqtyrǵan Andreı Nazarovtyń komandasy - «Neftehımıkti» 6:1 esebimen oısyrata utty. Sodan keıin Qazanda 7 qyrkúıekte QHL-daǵy eń azýly klýbtardyń biri «Aq Baryspen» terezesi teń oıyn órnegin kórsetkenimen, 3:4 esebimen ese jiberdi.
Astanalyqtar endi elordaǵa oralyp, «Barys Arenadaǵy» alǵashqy kezdesýin 12 qyrkúıekte sol «Neftehımık» komandasymen ótkizedi. Óz aıdynynda iri eseppen jeńilip, jerge qaraǵan A.Nazarovtyń shákirtteri bul oıynda qarymta qaıtarýǵa tyrysatyny anyq.
