Hokkeı: «Barys» overtaımda «Kýnlýn Red Star» komandasynan basym tústi

ASTANA. QazAqparat – «Barys» Qurlyqtyq hokkeı lıgasyndaǵy kezekti oıynyn búgin Qytaıdyń «Kýnlýn Red Star» (Beıjiń) komandasyna qarsy ótkizdi, dep habarlaıdy QazAqparat tilshisi.

Reseıdiń Mytışı qalasynda bolǵan kezdesýde komandalar tartysty oıynymen erekshelendi. Soǵan qaramastan birinshi kezeńde tablodaǵy esepke ózgeris engen joq.

Ekinshi kezeńde «Barys» hokkeıshisi Lıden Veı 32-mınýtta mergendigimen kózge tústi. Budan keıin qytaılyq komanda tarazy basyn teńestirýge umtyldy. Degenmen dittegen maqsatyna jete alǵan joq.

Úshinshi kezeńniń 56-mınýtynda qytaılyq komandadan Djek Rodevald tarazy basyn teńestirdi.

Negizgi kezeń 1:1 esebimen teń aıaqtalyp, oıyn overtaımǵa ulasty. Overtaımda Nıkıta Mıhaılıs jeńis shaıbasyn soqty.

Osylaısha, «Barys» qarsylasynan overtaımda 2:1 esebimen basym tústi.

Aıta ketsek, eki komanda da pleı-off satysyna shyǵýdan shet qaldy. Týrnır kestesinde «Barys» 20-orynda kele jatsa, «Kýnlýn Red Star» 21-orynda tur.

Endi elordalyq klýbtyń alda úsh oıyny bar. Aldymen 20 aqpanda Reseıde «Avangard» (Omby) komandasymen kezdesse, odan keıin 22 aqpanda «Sıbır» (Novosibir) komandasymen sheberlik baıqasady.

Qurlyqtyq hokkeı lıgasy turaqty kezeńindegi sońǵy oıynyn elordada 24 aqpanda Reseıdiń «Lokomotıv» (ıAroslavl) komandasyna qarsy ótkizedi.

Eske salsaq, budan buryn qazaqstandyq klýb elordada Belarýstiń «Dınamo» komandasyna ese jiberdi.