Hokkeı: «Barys» overtaımda «Avangardty» jeńdi
NUR-SULTAN. QazAqparat - Qurlyqtyq hokkeı lıgasy aıasynda elordalyq «Barys» búgin, 16 aqpanda óz aıdynynda «Avangard» (Omby) komandasyn qabyldady, dep habarlaıdy QazAqparat tilshisi.
Eki komanda buǵan deıin 61 márte sheberlik baıqasty. Onyń 21-de «Barys» basymdyq tanytsa, qalǵanynda «Avangardtyń» mereıi ústem boldy.
Bıyl komandalar bir-birimen eki márte kezdesti. Qarsylastar bir-bir márteden jeńiske jetti. Olar búginge deıin pleı-off kezeńine shyǵyp úlgerdi. Endigi kezekte týrnır kestesindegi jaǵdaıyn jaqsartyp, ózine yńǵaıly qarsylasqa jolyǵý mindeti aldarynda tur.
Búgingi kezdesý tartysty ótti. Esepti 6-mınýtta «Barys» hokkeıshisi Álıhan Ásetov ashty. Oǵan 9-mınýtta reseılik Rıd Býshe bir shaıbamen jaýap berip, tarazy basy teńesti. Al 30-mınýtta Nıkıta Mıhaılıs elordalyq klýbty taǵy da alǵa shyǵardy. Oıynnyń 59-mınýtynda «Avangard» oıynshysy Korban Naıt tarazy basyn teńestirip ketti. Osylaısha kezdesý overtaımǵa ulasty. Overtaımda Nıkıta Mıhaılıs jeńis shaıbasyn soqty. Oıyn 3:2 esebimen «Barystyń» basymdyǵymen aıaqtaldy.
Endi «Barys» 18 aqpanda elordada Reseıdiń «Avtomobılıst» komandasyn qabyldaıdy.
Esterińizge sala ketelik, budan buryn reseılik «Metallýrgten» jeńildi.
