Hokkeı: «Barys» ombylyq «Avangardty» jeńdi

Búgingi oıynǵa deıin «Barys» pen «Avangardtyń» 18 ret kezdeskenin atap ótken jón. Sol matchtarda qarsylastar 12 ret jeńiske jetse, 6 oıynda bizdiń mereıimiz ústem boldy. Alaıda osy kezdesý bárinen de ózgeshe ótti deýge bolady. «Barystyń» forvardy Brendon Bochenskı oıynnyń 22 sekýndynda (!) esepti ashyp, Qurlyqtyq hokkeı lıgasynyń jańa maýsymynda eń jyldam shaıbanyń avtory atandy. Shyny kerek, «Avangard» eseńgirep qaldy. Buǵan deıin olardyń «Aq barstan» 0:5 esebimen utylǵany taǵy bar. Áıteýir, «Avangard» oıynnyń ekinshi kezeńinde ǵana esin jıǵandaı boldy. Esep teńesti. Alaıda ekinshi kezeńniń aıaǵyna deıin bes mınýt qalǵan kezde, Roman Starchenko jáne Talǵat Jaılaýov eki birdeı shaıbany soǵyp, esepti 3:1-ge deıin jetkizdi. Al úshinshi kezeńde «Avangardtyń» hokkeıshileri tártipti jıi buza bastady. Sol úshin taǵy bir shaıbany jiberip qoıdy. Esep - 4:1. Osydan keıin lıganyń azýly komandalarynyń biri - «Avangardtyń» qaýqary tek bir shaıbaǵa ǵana jetti. Onyń ózin olar bir hokkeıshige artyq oınap, salyp ketti. «Barys» bolsa, onymen toqtaǵan joq. Maksım Spırıdonov esep aıyrmasyn 5:2-ge jetkizdi. Osylaısha, «Barys» taǵy úsh upaıǵa qol jetkizip, QHL-dyń Shyǵys konferentsııasynda birinshi orynǵa shyqty. Jalpy týrnırlik kestede astanalyq klýb tórtinshi orynǵa ornalasty. Onyń enshisinde qarsylastardyń qaqpasyna soǵylǵan 27 shaıba bar. Ázirshe, bul - eń úzdik kórsetkish.

Aıta keteıik, «Barystyń» kelesi oıyny syrt alańda ótedi. Hanty-Mansıısk qalasynda ol «ıÝgramen» kezdesedi.