Hokkeı: «Barys» «Neftehımık» komandasynan basym tústi
ASTANA. QazAqparat - «Barys» Qurlyqtyq hokkeı lıgasyndaǵy kezekti oıynyn búgin Reseıde «Neftehımık» (Nıjnekamsk) komandasyna qarsy ótkizdi, dep habarlaıdy QazAqparat tilshisi.
Kezdesý barysynda eki komanda oıyn basynan gol soǵatyn múmkindikti izdedi. Dese de olar dittegen maqsatyna jete almaı jatty. Alǵashqy kezeńde komandalar bir-biriniń qaqpasynan sańylaý taba alǵan joq.
Ekinshi kezeńniń 32-mınýtynda «Neftehımık» hokkeıshisi Aksel Galımov óz komandasyn alǵa shyǵardy. Budan keıin tablodaǵy esepti ózgertetin birneshe múmkindik bolǵan edi.
Úshinshi kezeńniń 41-mınýtynda «Barys» sapynan Maıkl Shapıý tarazy basyn teńestirse, 53-mınýtta Djeremı Brakko qazaqstandyq komandany alǵa shyǵardy.
Al Maıkl Shapıý 59-mınýtta bos qaqpaǵa jeńis shaıbasyn soqty.
Osylaısha «Barys» qarsylasynan 3:1 esebimen basym tústi.
«Barys» endigi oıynyn 21 jeltoqsanda elordada Reseıdiń «Avangard» (Omby) komandasyna qarsy ótkizedi.
Eske salsaq, budan buryn elordalyq klýb býllıtte «Ak Bars» komandasynan basym tústi.
