Hokkeı: «Barys» Naıdjel Doýstyń komandasyna ese jiberdi
ASTANA. QazAqparat - Qurlyqtyq hokkeı lıgasynyń kezekti matchynda «Barys» óz aıdynynda Ekaterınbýrgtyń «Avtomobılıst» komandasyn qabyldady, dep habarlaıdy QazAqparat tilshisi.
«Avtomobılıst» Shyǵys konferentsııasynda 55 upaımen kósh bastasa, astanalyqtar (44 upaı) besinshi orynda keledi.
Bir qyzyǵy, budan buryn «Barystyń» kapıtany bolyp, jasyndaı jarqyldaǵan Naıdjel Doýs bıyldan bastap «Avtomobılıske» aýysyp, qarasha aıynyń qorytyndysy boıynsha 14 upaımen (7 gol+7 pas) QHL-dyń úzdik shabýylshysy atandy. Degenmen, odan «Barystyń» sapyndaǵy Darren Dıts te qalyspaı, 12 upaımen (3+9) úzdik qorǵaýshy ataǵyna ıe boldy.
Astanalyqtar quramyndaǵy kapıtan Brendon Bochenskı bastaǵan birneshe negizgi oıynshynyń jaraqat alyp, qatardan shyǵýy «Barysqa» ońaı tıgen joq. Sonyń da áseri bolar, budan buryn óz aıdynyndaǵy úsh kezdesýde elordalyqtar jeńilis tapty. Degenmen, sodan soń syrt aıdyndaǵy úsh matchtyń ekeýinde jeńiske jetip, jaǵdaıyn qaıta túzegendeı boldy. Bul oıyndarda Alekseı Maklıýkov, Álıhan Ásetov, Anton Sagadeev syndy jas hokkeıshiler de ózderin jaqsy qyrynan kórsete bildi.
«Barystyń» kapıtany Kevın Dallman QHL-daǵy 600-inshi matchyn ótkizse, Roman Starchenko 500-ge jetkizdi.
«Barys Arenadaǵy» kezdesý qonaqtardyń tártip buzýymen bastalyp, ony astanalyqtar paıdalana alǵan joq. Mundaı múmkindikti «Avtomobıst» te múlt jiberdi. R.Starchenko qaqpashy ıAkýb Kovarjben jeke dara shyqqanymen, oǵan sáttilik jetispedi.
Kóp uzamaı oıyn tizginin meımandar qolǵa alyp, 9-mınýtta «Avtomobılıstiń» kapıtany N.Doýstyń pasynan keıin Stefan De Kosta chehııalyq Domınık Grahovına qorǵaǵan qaqpadan sańylaý tapty. Budan keıin «Barys» sapyndaǵy kanadalyq shabýylshy Kertıs Volk birneshe múmkindikti múlt jiberdi. Kerisinshe 16-mınýtta Egor Mılovzorovtyń pasynan keıin qaqpa buryshynda jalǵyz qalǵan Aleksandr Kýcherıavenkoǵa gol soǵý esh qıyndyq keltirgen joq.
Birinshi kezeńnen keıin «Avtomobılıst» 2:0 esebimen alda turdy. Onyń ústine Roman Starchenkonyń jaraqat alýy «Barystyń» jaǵdaıyn qıyndata tústi.
Ekinshi kezeń basynda «Avtomobılıst» sapyndaǵy frantsııalyq shabýylshy Stefan De Kosta ekinshi márte tártip buzyp, astanalyqtar taǵy da san basymdyǵyna ıe bolǵanymen, odan esh nátıje shyǵara almaı, ózderine gol ótkizip ala jazdady.
Evgenıı Grachev aıdynnan qýylǵan sátte de «Barys» bul múmkindigin paıdalana almady. Degenmen 35-mınýtta Kevın Dallmannyń pasynan keıin Pavel Akolzın esepti qysqarta aldy. Alaıda mınýt jarymdaı ýaqyt óter-ótpeste Naıdjel Doýs qarymta shabýyl kezinde óziniń bıylǵy maýsymdaǵy 16-ynshy golyn soqty - 3:1. Sálden keıin Dastın Boıd aıdynnan qýylǵan sátti paıdalanǵan Anatolıı Golyshev qaqpa jaqtaýynan keri serpilgen shaıbany dál soǵa bildi - 4:1.
Úshinshi kezeńde N.Doýstyń pasynan keıin Stefan De Kosta esepti 5:1-ge jetkizdi. «Barystyń» qorǵanys shebin jalǵyz ózi jaryp ótken Artem Gareev te D.Grahovınany qapy qaldyrdy - 6:1. Budan soń qaqpaǵa Henrık Karlsson turdy. Esesine «Avtomobılıstiń» qaqpashysy ıAkýb Kovarj match barysynda sátti oınap, kóptegen qaýipti soqqylardy qaıtara bildi.
P.Akolzın tártip buzyp, aıdynnan qýylǵan soń N.Doýs osy matchtaǵy ekinshi golyn soqty - 7:1.
Kezdesý aıaqtalýǵa 2 mınýttaı ýaqyt qalǵanda, Nıkıta Mıhaılıstiń soqqysyn ıA.Kovarj qaıtaryp úlgergenimen, Kertıs Volkka eshteńe jasaı almady.
Osylaısha «Avtomobılıst» 7:2 esebimen jeńiske jetti.
Andreı Skabelka jattyqtyratyn «Barys» endi 3 jeltoqsanda «Metallýrg» (Magnıtogorsk), 6 jeltoqsanda «Traktor» (Chelıabi) komandalaryn qabyldaıdy.
Eske sala keteıik, budan buryn «Barystyń» «Severstal» komandasyn utqanyn jazǵan bolatynbyz.
Foto: hcbarys.kz
