Hokkeı: «Barys» máskeýlik «Spartak» komandasyn jeńdi

Osy joly da esepti ashqan «Barys» boldy. Komanda legıoneri, tafgaı Djoshýa Gretton óz múmkindigin qalt jibergen joq. Ol R.Starchenkonyń bergen pasyn sheber paıdalanyp, shaıbany týra qarsylastyń qaqpasyna baǵyttaı bildi. Esep - 1:0. Bul - muz aıdynyndaǵy tóbelestiń has sheberi Dj.Grettonnyń jańa maýsymdaǵy alǵashqy shaıbasy. Jankúıerlerdiń qýanyshynda shek bolmady. Tafgaıdyń ózi de osy shaıbadan keıin qanattanyp, shıraq oınaı bastady. Birinshi kezeńniń orta sheginde «Spartak» tarazy basyn teńestirdi. Alaıda Konstantın Rýdenko óz komandasyn qaıtadan alǵa shyǵardy. Ekinshi kezeńde esep ózgermedi. Al úshinshi kezeńde shaıbalar qarsha borady. M.Rahmanov pen Maık Landın «Barystyń» basymdyǵyn 4:1-ge deıin jetkizse, qarsylastar baryn salyp, esep aıyrmasyn bir shaıbaǵa qysqartty. Oıynnyń sońǵy mınýttarynda qaqpashyny alyp tastap, bir hokkeıshige artyq quramda da shabýyl jasap kórdi. Alaıda «Barystyń» bekem bekinisin buza almady. Qorytyndy esep - 4:3. Aıta keteıik, osy oıynnan keıin «Barystyń» qorjynynda 27 upaı bar. Lıganyń favorıti - «SKA» komandasynda da 27 upaı. Alaıda astanalyq klýb bir oıynǵa kem oınap, qarsylastyń qaqpasyna soqqan shaıbalardyń sany jaǵynan oq boıy ozyq turǵandyqtan, jalpy týrnırlik kestede ol birinshi orynǵa kóterildi.