Hokkeı: «Barys» máskeýlik «Dınamony» tize búktirdi
ASTANA. 10 qazan. QazAqparat - Búgin «Barys» hokkeı klýby óz alańynda máskeýlik «Dınamony» jeńdi.
Bul oıynda tóreshilerdiń máskeýlik komandaǵa bolysqany barynsha baıqaldy. Ekinshi kezeńde qarsylastar esepti birinshi bolyp ashsa da, «Barystyń» hokkeıshileri biraz arpalysyp, tarazy basyn teńestire bildi. Alaıda kezeńniń aıaqtalýyna sanaýly ýaqyt qalǵanda, tóreshiler bolmashy jerde astanalyq klýbtyń oıynshysyna eki mınýttyq aıyp taqty. «Dınamo» bir hokkeıshige artyq oınap, taǵy bir shaıbany soǵyp ketti. Esep - 2:1. Osymen ekinshi kezeń de aıaqtaldy. Úshinshi kezeńniń basynda tóreshiler «Barystyń» eki birdeı oıynshysyn muz aıdynynan alastatyp, máskeýlik klýbqa úshinshi shaıbany salýǵa múmkindik berdi. Esep - 3:1. «Barystyń» eńsesi túsip, saǵy synǵandaı boldy. Alaıda on mınýttyń ishinde astanalyq klýbtyń hokkeıshileri naǵyz batyldyq tanytty. Roman Savchenko esep aıyrmasyn qysqartsa, komanda kapıtany Dmıtrıı Ýpper tarazy basyn teńestirdi. Sonymen oıynnyń negizgi ýaqyty da aıaqtaldy. Qosymsha ýaqytta jeńimpaz anyqtalǵan joq. Al býllıt serııasynda «Barys» birden alǵa shyqty. Qarsylastar da qalmaı, esepti teńestirip otyrdy. Biraq Dastın Boıdtyń dál tıgizgen soqqysynan keıin, qaqpashymyz Vıtalıı Eremeev qarsylastardyń býllıtin sheber qaıtara bildi. Sonyń arqasynda «Barys» bir shaıbamen alǵa shyǵyp, máskeýlik «Dınamony» 4:3 esebimen jeńdi. Aıta keteıik, osy matchtan keıin «Barys» hokkeı klýbynda 31 upaı bar. Jalpy týrnırlik kestede komanda úshinshi orynda keledi. «Dınamo» bolsa, Astanadaǵy oıynda qanaǵat tutqan bir upaıdyń arqasynda ekinshi ornyn saqtap qaldy. Degenmen, astanalyq klýbtyń bir oıynǵa kem oınaǵanyn eskersek, máskeýlik klýbtyń aldyn orap ketýge áli talaı múmkindik bolady.
